Neste siléncio friu

Todo ye siléncio na scuridon deste cielo. Todo ye siléncio nesta tierra adonde ls uossos se sténden cedo ne l xaragon por falta de asseranadores. La telbison nun fala la sue fala i solo eilha fala i fala alto para oubidos cun tímpanos gastos...
Cheira a Outonho an to las squinas de la casa cun oulores a marmelos a spera de açucre, a maçanas ne l sobrado, a colgadeiros de ubas, a pimientos que sobrórun i que me spéran anriba de l munton de batatas, nórias amarielhas yá un pouco spaixaracadas. Cheira-me a Outonho, anque nun tenga bido las quelores calientes de l termo. Quando cheguei yá l moucho cantaba nos cerrados deiqui de baixo.
Ls renacalhos anterrórun-se ne l lhodo cun miedo a la gilada; ls grilhos stán guardados nos foios a treinar las cantigas para soutranho; las streilhas arreculhírun-se, nun sei se por star anubrado, se por miedo de mirar pa l assumadeiro para adonde you miro nesta nuite frie a sue percura.
Nien ua jinelica cun la lhuç a tembrar, solo las lhuzes de ls lampiones de la rue se amóstran, nien ua lhuzica nas casas para adonde stou a mirar.
Lhádran-me ls perros quando salo al lhado de fuora de la puorta, cumo se stranha yá me sentíssen nesta tierra, ouséncia bai para dous meses.
Miro l cielo i, anriba de San Martino hai un claron, guapo, a marcar sue perséncia de aldé galana. Talbeç alhá haba quien se assome a ber streilhas i tamien beia l claron de la Speciosa. Talbeç nó. Talbeç nun haba bibalma que se baia de l lhume a estas horas para ber las streilhas nesta nuite de aire de la sierra que corta las narizes.
Nien l lhobo que tanta beç se oubie eiqui, nos touçones de l Forno se assoma agora. Para quei se las canhonas yá nun drúmen ne ls chequeiros…
A la pormanhana quando l sol benir, l Praino há-de amostrar las sues quelores de fogo i siempre haberá paixaros a cantar que mais nun seian ls tordos a buoltas a las azeitonas mesmo que inda nun stéian maduras.