Pequeinhas i relhamposas.
Faein ua parba no chano
Duricas mas mui amerosas
Son colhidas a la mano.
An baixo de l castanheiro
Cun pelhiços misturadas
Hai que ls zbiar purmeiro
Para nun lhebar picadas.
Cun galho de carrasqueira
Para eibitar las picadas
Juntan-se nua buntoneira
I quedan so las pingadas.
Ua a ua pa la cesta
Ban-se scolhendo assi
Só se agarra la que presta
La ouxada queda alhi.
Cruda s cozidas i assadas
Todos las quieran quemer
An magostos ou an fiestas
Son siempre de apetecer.
Guisadas cun jabali
Faien prato bien famoso
You cunfirmo, yá l quemi
I garanto que ye gustoso.
Comen-se crudas e assadas
Cozidas i an guisados,
An doces tamiem udsadas
Que son bien apreciados.
De l probe yá fui sustento
Hoije ye petisco de rico
Bira l mundo nun momento
I la bida nun cachico.
Se an Agosto adrega a chober
Mais un cachico que fura
Anton ye que iba a ser
Anho de grande fartura.
2 comentários:
Crudas, cozidas ou assadas. Quenticas. Auga na boca.
Que buonas son las castanhas!
Buonos petiscos.
Saludo,
António Cangueiro
Iba you lendo sien saber quien era l´outor, i pensando: de quien seran estas quadras tan singelas i outénticas.
Quien habie de ser, tu Felç, l home de ls poemas!
Beisicos. You bou a ber se inda me ançisco nun magosto ende.
Beisicos,
Delaide
Enviar um comentário