23/11/10

BERSOS

.
Quando andube na tropa, fazie un jornal de parede i cumo ye de mi, la sátira staba tamien presente, tanto an prosa cumo an berso. Nun sei se yá poni eiqui estes bersos, mas se ye la segunda beç, nun faç mal.
Teniemos un alferes, que quando sustituie l capitan, pensaba que era l maior, mas era buona pessona, solo que nun se daba cunta de que pensaba miesmo que Dius nun eisistie, porque era el l único Dius que habie.
Ls bersos fazírun-le bien i inda soutordie falemos nesso, hoije ye el miesmo, mais houmilde, buono, de quien todos ls que inda stán bibos gústan. Passados que fúrun 39 anhos, inda mos ajuntamos tols anhos para almuorçar.
.
L XEFE
.
You sou l xefe.
You ye que mando.
Se alguien pensar
Miu mando nun acatar,
You lougo l mando,
Pa la mata passear.
You ye que mando.
You sou l xefe...
.
1970 - Angola

6 comentários:

ACangueiro disse...

Gostei!
L xefe manda
I se manda bien
Que mande l xefe.

Adelaide Monteiro disse...

Esta fizo-me lembrar outra. L tiu de ls mandiletes dua repartiçon pública, ua fin de tarde, quando yá solo staba el i la tie de las lhimpezas, diç-l cun to la outeridade: Eiqui agora quien manda sou you. Ide-me a cumprar un maço de cigarros!
Manda quien puode!

Fui berdade.

Ana disse...

Era un tiempo an que houbo quien cunsidrasse que habie trés cousas que debien de ser puostas anriba de muitas outras; éran : Dius, Pátria i outoridade... i l resultado fui: ua guerra quelonial que nun trouxo nada de positibo para Pertual.

La única forma d’houmildade que puode eisistir hoije ye la mimória que cada un debe cunserbar biba por todos aqueilhes que quedórun marcados pa la bida anteira ou pior inda : que nunca tornórun dessa guerra einútil (cumo todas las guerras seian eilhas quales fúren) adonde por acaso alguns (muitos ?) querien mandar. Mas mandar para quei se furmos a ber ?

P’ra nada !

Unknown disse...

Yá eiqui dixe que tener rezon, nun ye tener la rezon.
Todos tenemos la nuossa rezon, mas mais amportante qu'esso ye saber respeitar la rezon de ls outros i star pronto a çcutir las dues rezones, la nuossa i la de ls outros, para chegar a la rezon que melhor sirba a todos.

Antonho, nun cuncordo cun esso de l xefe, porque todos somos parte de ua máquina i todos mandamos i serbimos. Quando aceitamos xefes, squecemos l que se passou al aceitar Salazar, Hitler, Stalin...

Adelaide, tamien nun cuncordo cun esso de manda quien puode, naide manda nada, faç la sue oubrigaçon, que ye eisercer l cargo que le stá ctinado ou que le fui dado puls outros.

Ana, tamien you sou acontra la guerra i porque sei bien l que ye ua guerra, nó por oubir dezir. Mas solo hai guerras porque hai pessonas que solo bíben para fazer guerra, que nun respéitan ls outros, que se pénsan duonhos de la rezon i de la berdade. Guerra nun ye solo la de las armas, mas tamien i essa ye la peor, la guerra psicológica, la guerra de las eideias, la guerra de l denheiro.

Ana disse...

Primo,

L que se diç tamien antressa !
Por eisemplo... i para un nun ber las cousas solo dun punto de bista... l que tamien dízen i cúntan ls que stában de l lhado daqueilhes que ls soldados Pertueses cumbatien. Todas las bozes, i nó siempre las mesmas, mos dében antressar, esto caso téngamos la preocupaçon de ber las cousas cun la mais grande oubjetibidade possible.

Adelaide Monteiro disse...

Manda quien puode i quando puode i nun ye fácel mandar bien. Ten que haber quien mande, no sentido que haba ua buona liderança, porque, se assi nun fur ye la república de las bananas pochas sien rei nien roque. Quando digo manda quien puode, nun ye an sentido de totalitarismo, mas si un mandar an democracie, mas eiqui tamien ten que haber liderença fuorte, a miu ber; la democracie nun ye fazer l que cada un quier, cumo ye anterpretada muita beç, mas si tener posseblidade de botar para an cuncéncia eileger quien goberne, que ye ua cousa mui defrente de cada un fazer l que dá na rial gana; ye tener ourganismos cumo por eisemplo ls sindicatos para defender ls sous dreitos. Chefe ye chefe i siempre será i mal de l ourganizaçon que nun ténga ua buona chefie, assi cumo mal de la famílhia que nun tenga quien stabeleça regras...

Bá, tu gustas de troca de eideias i eiqui tenes, anque houmildes, alguas de las mies.
Ne l causo de l tiu de ls mandiletes, fui ua graça que you fize. L home, farto de fazer recados, ir adonde l mandában, quijo ua beç ser chefe i achou que poderie ser cun la tie de la lhimpeza. Claro que eilha nun fui puls cigarros.

Un beisico,
delaide