Jogos [Pintura de Brueghel, sacada de l'anternete]Cun este quadro de Brueghel quiero fazer un zafio a to l mundo que scribe i lei neste blog: adebinar l mássimo de jogos que stan repersentados ne l quadro de Brueghel. Muitos deilhes fúrun jogados por mi i cuido que por muita giente que eiqui scribe i lei. Para todo quedar mais claro ten que se andicar l jogo ne l sítio de l quadro adonde stá zenhado ou, anton, dar ua eideia de cumo era l jogo. Clicando ne l quadro, el queda mais grande.
Por mi, i para ampeçar, deixo eiqui l nome dun que stá repersentado a la dreita an baixo: arrinca nabiça, que alhá bai tiu Manuol de chouriça.
Por mi, i para ampeçar, deixo eiqui l nome dun que stá repersentado a la dreita an baixo: arrinca nabiça, que alhá bai tiu Manuol de chouriça.
Ye possible que l nome puoda bariar de tierra parra tierra. Ende, pouode ser antressante dezir cumo se chama noutras tierras an que nun tenga nome armano. Este quadro tem arrimado a 500 anhos, mas ls jogos nun demudórun muito, al menos an relaçon a la mie menineç.
9 comentários:
para mi beio, al meio de l quadro, l jogo "ua de la mula"
(dues de l riló,trés saltipés quatro salto, cinco brinco....)
quereis saber mais....
L que diç Manuol nun ye "Ua de la Mula" ye "Salta Bomba". Tamien se bei uns a "Maça Culos" de l lhado dreito i outros a jogar a "Cadeirinha Pó Pó"
Tamien hai uns a andar de rodadeira
Anton, esso de ls jogos inda bos antressa assi tanto ?
Ye prouba dua eiterna mocidade… !
Anfeliçmente nun sei mui bien dezir l nome desses jogos que yá eisistien naquel tiempo (seclo XIV) i qu’ inda hoije eisísten (siempre eisistírun, probablemente an todos ls sítios de l mundo) ; a nun ser talbeç « jogar al soteiro ou a la soteira» . Acho que ye l que stan a fazer ls ninos lhougo a la mano squierda, ne l purmeiro plano. Nun debie de ser cun denheiro... Adonde habie denheiro ? Mas ls ninos, cumo toda la giente sabe, ténen siempre ua eimaginaçon straordinaira… I nós ls adultos só ganhamos, sabendo guardar siempre biba essa eimaginaçon ! Nun áchan ?
L primeiro, ls rapazes, uns an riba d'outros, "arrinca nabiça".
L jogo que Manuol bandarra diç "ua de la mula" "Anjo Rebolbanjo". No alentejo yé "Lá bai alho"
Alhá pa la punta de riba, de l lhado squierdo:
- uns chúben a ua arble alta, que era un jogo muito nuosso;
- dous cuorren cun boladeiras, daqueilhas que se fazien cun cachico quadrado de papel i picos de silba.
Hai muitos mais, mas deixo-los para quien çcubrir.
Buono! Jogos porqui nun fáltan! An Tortulhas, l que le chamais "ua de la mula", "salta bomba", "anjorebolbanjo" ou "lá bai alho", eiqui chama-se "burro monte" i quando studemos an Miranda chamábamos-le "mosca".
Peç-me que tamien stan uas garoticas a jogar a las "necras" i de l lhado dreito anté me anubro por ber que peç que le ban a fazer ua "barrela" a un.
Ne l miu tiempo, quien fazie las rodicas de berguinha más bien feitas acá yera l Zé Falcon, apuis la gancheta qualquiera un yera home de la fazer!
Enviar um comentário