Die de frauga

L ferreiro a martelhar l fierro an brasa, na sue çafra [tiu Jesé Marchacan, Sendin, anhos 80 de l seclo XX]

Nun die de l més de Febreiro, era deimingo a horas de cena. Jesé Gregoiro cumbersando cun sue tie:

- Ne l Sagrado, a salida de missa, ancuontrei Jesé Juquin, ende aporbeitei para acertar l die de frauga. Dixo-me que stá sien naide pa l meio de la sumana que ben, i si puode marcar cun nós, s’acauso nun faltar l fierro que anquemendou. Dórun-le palabra que yá chega a la staçon de l camboio de Dues Eigreijas manhana. Bamos haber se tamien dá jeito a tou armano Manuol Einácio. Tengo que fazer torna jeira cun el a malhador, pa l fuolhe ls rapazes dán cuonta de l recado. I s’acauso sobrar tiempo gaçpiamos las sues reilhas i las guinchas que s’asparece que ye l que ten solo astanho pa l ferreiro, pula cumbersa que me fizo soutordie.

Sabel scuitaba-lo bien atienta. I acrescentou:
- S’assi fur, you i cunhada tratamos que acá s’almuorce nesse die. Cun eilha bien you m’amanho. Trata de saber l die cierto para botar ls botielhos a demolhir de biesperas. De botielhos yá solo quédan ls de la Páscoa. Nun te dezie you que astanho éran scassos? Nien meia bara teniemos deilhes al fumeiro!

Por este ambersar se puode ber quanta lhigaçon habie ne l mundo de las famílias i artes. Anté parecie que l die de frauga era un die special, pus quemien-se botielhos cumo ne l die de la rucerreiçon de l Senhor.
L die de frauga, de çquila, de lhimpa, de bandima, de çapateiro, de la matáncia de ls cochinos, éran dies de fiesta an casa, nua ounion culs parientes, amigos i bezinos.
Nun ouniberso de trabalho i tradiçon, que solo tenie pareilho, adonde las gientes éran l mais importante.