08/06/07

Siempre tu lhéngua


Alhá loinge
Ambaixo de l sol scaldante
De l çanceinho i de l sudor
De l sentimiento i de l amor
De l friu cortante
Stubiste siempre tu
lhéngua

Porque las cousas
Ls montes i las sierras
Las ourrietas i ls prainos
Las fuontes i las lhagonas
L quejírun
Stubiste siempre tu
lhéngua

Cumo la frol
L grano i l fruito
L cuorpo i la semiente
L rebento i la fróncia
Cumo ua mai
Stubiste siempre tu
lhéngua

Cumo pariente
Fuste carreiron i camino
Mimória fazendo stória
Para anchir de glória
L coraçon de las gientes
Stubiste siempre tu
lhéngua

Lhéngua de bida
De nacer i mamar
De arrolhar i drumir
De chorar i boziar
De lhabrar, sembrar i segar
De moler, amassar i amar
De daprender i d’eiducar
Stubiste siempre tu
Lhéngua Mirandesa

1 comentário:

Amadeu disse...

Quien c'ua lhéngua naciu
Nunca la squece a baler:
Queluobra que piel perdiu
Lhougo outra torna a nacer.

Fonso Roixo