24/08/10

Yá you sinto



Sorbido l sangre de ls çponeres a que Agosto mos aquestumou, stá la nuite fresca cun sou recio que hoije mais se sinte, para alhá de la Funtásia.
La lhuna chena reza ua ouraçon para que ls anubrados nun béngan a tapá-l sous uolhos quelor de alabastro an eigreija eitaliana quando la lhuç de l sol l ferbe subre las paredes. Mira-me cun sue risa rasgada, eilumina-me ls botones de l cumputador cun sue lhuç de milhones de candeias, cumbida-me a antrar por sues doces cantigas.
You, cun sede de abinturas, cun eilha scapo a percurar las nubres que tapórun l sol neste çponer i dezi-l que énchan sues cerronas d´auga que tanta falta fai para apagar la sede destas grietas que rachórun l Praino de sequidon.
Todo ye sereno nesta nuite mais fresca, apuis que las fiestas bán acabando, las lhágrimas de l fogo se apagórun ne las augas de l Frezno i an qualquiera aldé. Sóbran las canhas tumbadas que quédan a la par de lhágrimas que nun stourórun, sperando ninos sonhadores que deilhas fágan stouretes a cuntinar sues fiestas.
Sóbran fiestas para tan pouca giente, sóbran músicas para tan poucos pies dançadores…
Yá Agosto bai alto, San Bartelameu pormete auga mais un anho, hoije, para, adregando a chober, nel se beia milagre, anque el témbre de friu i se l´éncha la piel que tén colgada de l braço, de quelobrinas.
Yá you sinto l oulor a tierra molhada...
Anubradas negras sorbírun l sol burmeilho neste çponer, seinha d´auga anunciada por bozes que fúrun siempre quedando, nacidas nun se sabe an que fuolha de Borda d´Auga, mesmo mui antes de tal lhibico haber nacido.
Bamos a tener auga, que l sol se çpuso anubrado, cumo se se fazíra ua porfessie!... A las bezes si bén l´auga, outras, apenas tempestade d´aire.
Anubradas negras, ide a buscar auga que fága nacer la nabina, que aguiche las coubes mercadas a sendineses i siempre apregonadas cumo las melhores para tronchos ne l Natal, que fága rebigorar la piel stonhada de las manos, de puxar l cigonhal de l poço cada beç mais fondo.
Yá you sinto ls truonos i cerro ls uolhos an cada relhistro a sustener l miedo de las chiçpas, me stribo al trubisco i ansaio l´ouraçon a Santa Bárbela...
Yá you beio ls sapicos a dar bolcos ne ls cerros, caídos dua anubrada, cumo siempre todos eimaginábamos...



Sem comentários: