28/08/10

Oulores

Desta baranda adonde me refrescan madrugadas, nesta manhana sorbendo oulores.

Caminemos al tiempo que falabamos de nós i de nuossos sentires i ls sentires fúrun medrando cun ls oulores de yerbas i frutos brabos, salidos de cerrados i de caminos.

Stan secos ls caminos, stan pouco cuidados ls cerrados, chenos de silbeirones ne las bordas. Yá ls amos nun l bótan sous carinos de calagouça que l lhimpen to las broças. Las máquinas son ansencíbles i quien las guia inda mais.Conhece-se lhougo quando l trabalho nun ye feito cun amor...
Ne l cerrado de l Turril, ambaixo la presa que fazírun, adonde siempre soube l nome de to las yerbas, adonde coincie to ls oulores, adonde tanta beç me chubi als freixos para que las bacas ls alcançássen cun sues lhénguas ásparas i deilhes sacássen berde: l cerrado nun parece l mesmo, peç que nun ten amo, até la fraga stragórun cun l cimento de la presa.
Assi i todo antrei i nien me queixei a Teresica de mius delores de alma de ber l buqueiro sien un gabelhon de silbas. Solo l dixe, stragórun-me la fraga... la fraga tan grande que fazie parte de la mie nineç i que era de l cerrado...


Tapa l buqueiro bien tapado, dezien-me siempre a mi quando iba a ser bueira! A ber se te cais de l fraguedo abaixo, nun andes alhá a resbalar que rompes ls farrapos!

Á cundanida que yá rumpiste las calcicas!...
Curai-me las nalgas que las tengo çfolhadas, mai Ana!
Cuitadica! A la cierta que si! Yá te boto alhá bino para zanfetar.


Qual resbalar, qual fraga que pouco yá se bei, atafanhada que stá cul cimento!!??

Mira Teresa, cheira a hourtelana de la ribeira debaixo de ls nuossos pies. Há-de fazer un licor prefumadíssemo!
Mira, estes son ls poeijos brabos, ua bariante mais braba de la que usan ls alentejanos ne l ansopado de borrego, cumo eilhes dízen. Mira que oulor fuorte i brabiu! Bai a ser licor de diuses...
Tu sabes todo, mulhier!
Cumo nun hei-de saber se you naci faç cuonta nun cerrado!?

Apuis fumos seguindo ribeira seca arriba, falando de poesie, falando de pintura, cousas que ambas a dues gostamos de fazer, cun cumbersa lharga que lhargamente darie para ua bida anteira, aqueilha de pessonas que gustan de oubir la mesma cantiga, cumo diç la mensaige de la cantiga de Rui Veloso.

Brunhos roixos, mais poeijos noutro cerrado ne la Funtásia, mais hourtelana de la ribeira. Estas son yerbas que gustan de balhes frescos i por isso se dan nestes lhugares.
Quando chegarmos a casa há-des ir a la baranda de l miu quarto i há-des pisar na yerba. Ye hourtelana de la ribeira. Aqueilha tierra era de l Turril, de la que saliu quando fazírun la presa. Cunsolo-me quando la piso i me chega esse oulor a cerrado...
Piso-la muita beç...

Sem comentários: