INDA HAI MUITA COUSA BUONA
Por muito que alguns quérgan eiguenorar, la buona cumbibéncia i la amizade inda son norma ne l Praino. Las aldés de Atanor i Prado Gaton son dues aldés bezinas de l nuosso cunceilho de Miranda i tanto nua cumo noutra hai familhias de ua i de la outra i muitos moradores son parientes, mas para alhá desso hai ua grande ligaçon antre las dues i se para alguns fui ua surpresa l que podeis ber ne l bideo, para nós que eiqui bibimos tols dies, sabemos que fui antes ua demostraçon de amizade.
Era fiesta de Santa Barbara an Atanor, onte fui an Prado Gaton i cumo l rancho de Prado Gaton habie porparado las danças mistas i ls pauliteiros para la sue fiesta, pus fui solo aparecer al fin de la procisson an Atanor i dar este spetáclo.
Ye este l berdadeiro folclore mirandés, natural i sien palcos nien grandes aparatos, ne l meio de l pobo, ne l adro de la eigreija, para todo mundo, las danças de toda la bida, ls lhaços que ls bielhos Tanoreses inda sabíen de cor zde quando teníen mocidade sufeciente para ls dançar. Bimos alegrie, mas tamien lágrimas nalguns uolhos, era l recordar de tiempos idos.
Mas bimos tamien l trabalho de Adriano i Nascimento que ansaiórun ls pauliteiros i las danças, bimos l passar de l teçtemunho na dança de l Canedo, que un die bos amostraremos tamien, an que cun quatro bielhos dançában tamien quatro ninos que yá ándan a daprender. Uns gánhan para dezir que dan scuola i outros dan scuola sien ganhar nada.
La musica i l quelorido de las fatiotas parecíen l cuntinar de ls campos alredror, que inda ban rejistindo a la calor i als fuogos, la alegrie nas caras de la giente parecie queréren scamugir ls bózios de tols dies que nas telbisones solo sáben assustar la giente an beç de boziáren acontra la eignoráncia i la ancumpeténcia.
Alhi habie autenticidade, amizade, alegrie, sperancia nun feturo melhor, porque ye sabendo tratar de las raízes que la planta puode crecer.
ATANOR, 21 de Agosto de 2010
Sem comentários:
Enviar um comentário