24/09/09

Ua anstituiçon central de la lhéngua i de la cultura mirandesas



[Testo screbido pa la FUOLHA MIRANDESA de 22/09/2209, mas nun publicado por falta de campo]


Yá quaijeque dieç anhos, zde l anho 2000, que tengo benido a chamar la atençon pa la necidade de se criar ua anstituiçon central de la lhéngua mirandesa, chame-se eilha Anstituto de Lhéngua i Cultura Mirandesas, ou Fundaçon de Lhéngua i Cultura Mirandesas ou tenga outro nome, que l nome pouco amportará. L amportante ye que seia ua anstituiçon central de l Stado, i que neilhe se cuncretize la repunsablidade que l Stado pertués assumiu quando la Assemblé de la República aprobou la lei 7/99. Nada desso ampedirá que neilha partecípen bárias antidades, públicas ou pribadas, mas nun puode ser apagado l sou carátele de anstituiçon cun poder al nible de la lhéngua i de la cultura, poder esse que le será dado pul goberno eileito democraticamente a nible nacional. Essa anstituiçon ten de ser supramunecipal por trés rezones eissenciales: a la ua la lhéngua mirandesa fala-se an mais do que un cunceilho; a la outra l mirandés ye ua lhéngua de Pertual i por todo l paíç debe de ser dibulgada; tamien eilha será la anstituiçon que repersenta la lhéngua an anstituiçones anternacionales. Anque se alhargue a la cultura, l centro dessa anstituiçon será la lhéngua mirandesa, yá que solo eilha la justefica cumo eilemiento diferenciador.
Yá por bárias bezes que tengo benido a trabalhar pa la criaçon dessa anstituiçon, apersentando sugestiones, falado cun menistros de la cultura i cun outras antidades, mas até agora inda nada passou de l papel. An tiempo de eileiçones siempre la sprança se renoba i por esso eiqui queda outra beç la eideia, que nunca deixarei calhar anquanto you podir i, cumo pessona outimista, stou cierto que un die hemos de chegar a algun lhado. L miu outimismo assenta na eideia de que esta será ua grande mais balie pa l anriquecimiento cultural de Pertual, cumo paíç tamien democrático ne l campo de la lhéngua. Puode lhebar tiempo a que las pessonas anténdan cumo la dibersidade ye ua riqueza, mas stou cierto que mais cedo ou mais tarde esso acuntecerá. Solo spero que seia mais cedo que tarde, quier dezir, que inda benga a tiempo de ajudar la lhéngua mirandesa.
Nun ye este l sítio cierto para deixar eideias quanto al que debe de se ser essa anstituiçon, anque hai muitos anhos tenga eideias claras quanto a esso.

Amadeu Ferreira




2 comentários:

Fir disse...

Buonas nuites, porsor Amadeu.
Parece-me uma boa ideia a criação desse instituto. Sei que o nome talvez seja o menos importante, mas acho que podia ter um nome de um escritor mirandês. Para criar um paralelo com o Instituto Camões (e o Instituto Cervantes e o Goethe, etc.)
Abraço.

faustino.antao disse...

Dius mos deia buonas tardes amigo Amadeu

-Que buono publicar estes testos eiqui.

Assi chégan a mais giente.

L mais agora que l jornal ralas son las bezes que l cuntenido de Mirandés queda çponible als lheitores na berson de l'anternete cumo dantes que benie siempre

You tengo l jornal mas muitos nun l ténen esta fui ua buona upa, porque ye amportante que todos tengamos bien persente l que se fai i nun fai, ls porblemas las pormessas i l nuosso fuorte deseio de a eilhas chegar quanto mais debrebe melhor.

Para sclarecer tenemos que star bien sclarecidos i a esso nun bos teneis poupado.



Un abraço
Faustino