15/09/09

Receita para screbir un poema

Para screbir un poema
ye neçairo oubir…
subretodo l silenço
que mos oube tamien…
i deixá-lo falar
subretodo a el.

«Quien sou?
i ls que respíran l mesmo aire que you
que quieren de mi ?»
Pregunto-le you a el...

I l silenço responde:

Scribe-lo l tou poema!
L que eilhes quieren nun ye mais que
un sunriso
para que s’acabe la nuite!
Ua ajuda
para ber nacer l sol!
La serenidade
an qualquiera momento de l die…
I ua pormessa sien fin:
De flor
De páixaro
D’amor
De paixon
I de suonho tamien…

I l que sós…?
Un pouco de todo l que ponires neste poema:
Ua flor
Un páixaro
Un amor
Ua paixon
Un suonho…

I un beiso tamien!

A ber se te squeces!



5 comentários:

"Scacição" disse...

Ana,buonos dies:)Que receita antressante esta!Gustei.Ls paixáros tamien são poéticos:)

Adelaide Monteiro disse...

Ei Ana!
Que bien que yá stou a falar outra beç cun bós todos i tamien cuntigo Ana!
Anteressante receita. Bai screbendo, amiga que nós gustamos. Inda stou a spera de las tues crónicas dende de l sul de França i que bou a apreciar de certeza. Bota acá para fuora todo esse saber i çencebilidade que tenes andrento.
Beisicos para ti i l tou tiu.
Adelaide

Almendra disse...

Si, ye berdade l que scuiteste, l que todos precísan ye dua risa i dun poema cumo l tou.
Bien haias, Ana.

Almendra

Ana disse...

Bien háiades, Amigos,

Tamien quedo a la spera de ls buossos testos i de ls buossos poemas, deseando-bos tamien muitas felcidades.

P.S. Las crónicas, Adelaide, pus-las un cachico de lhado. Zanguei-me a dada altura cun ua deilhas porque nun ancuntraba ua soluçon... de scrita.
Talbeç que cul tiempo... ?!

francisca carvalhal disse...

Ana, buonas nuites:
que cousa guapa, nun ai muitas pessonas cun çencebilidade de scuitar l silenço cumo tu.
Bai scuitando i "poetando" mais cousas.
Francisca