23/09/09

Las eileiçones



Bamos a tener eileiçones
Andan todos aterefados
Ban-bos a fázer purmessas
Por esso stai purparados.

Tengo ubido todo l que dizen
Menos falar de l nuosso Mirandés
Qu´inda nun ls oubi falar
Nien desta, nien de la outra beç.

Nun quieran nada cun el
Nel naide ls oube falar
Anton se nun cuontan cun nós
Praquei bamos nós a botar.

Passan porqui por nós
Çpeijan purmessas na mesa
Más naide ls oube falar
De la nuossa lhéngua Mirandesa.

Ye cumo se eilha nun eisistisse
Para todos estes senhores
Cumo se las nuossas crianças
Nun percisassen de porssores.

Porssores de Mirandés digo you
Tenen l deber de las ansinar
Pul menos an campanha
Debien neilhes falar.

Más nien a esso tenemos dreito.
Digo-bos eiqui you a bós
Que ls nuossos partidos
Nenhun se lhembra de nós.

Anton se assi ye
Porquei mos piden ls botos
Ye porque todos eilhes son
Son ua cambada de marotos.

Cumo nós somos patriotas
I aguantamos todos ls trancos.
Más eilhes bien merecien
Que l dissemos ls botos brancos.

Porquei? Nien estes senhores
Nien ls que benan a seguier
De la lhéngua Mirandesa
Mos tenen nada a dezier.

Esso ye solamente cun nós
Por aquilho que se stá a ber
Porque ls nuossos gobernantes
Desso nun quieren saber.

Más quieren ls nuossos botos
Por aquilho que se stá a ber
Bamos todos a botar
Que assi ye que ten que ser.

Son cousas de la democracia
Andan-mos todos a aldrabar
Pus na lhéngua Mirandesa
Naide ls oube falar.

You por mi(n)? Penso assi
Tengo l dreito de pensar
Pus anquanto tubier fuorça
Naide me fará calhar.

Dizen que sou eignorante
Porque nun me dórun eiducaçon
Más sei dezier-bos, i digo
Que de nós nun se lhembran non.

Pronto bamos a botar
Nas urnas aquel papel
Más l nuosso Mirandés
Merecie que fáziessan por el.

José António Esteves



3 comentários:

faustino.antao disse...

Dius mos deia buonas nuites


Puis si teneis bien rezon amigo Jesé Stebes.
Mas digo-bos l you que nun sei mentir, cun pessonas cumo bós, chenas de fuorça i grima
ten que ir nien que seia d'ampurion.

L mirandés nunca mais bai a quedar squecido, puis anton.

Bien háiades
Un arrochago abraço
Faustino

Ana disse...

Puis you yá botei ! Onte ! Pa las eileiçones legislatibas deste Demingo 27.
Para ser bálido i cumo l miu boto ben de l Strangeiro, tenie que l ambiar pul correio l mais tarde nesse die. Yá stá feito ! I mesmo antes de bós !

Bá, nun zanimeis ! La Democracie para ser ua berdadeira democracie ten que ser partecipatiba i supon que todos s’amplíquen dua maneira ou doutra… mas a fabor de la Democracie ! L que por bezes alguns squécen i ye pena, rebuoltante i einaceitable.

Mas partecipar tamien l cunseguis fazer chamando la atençon cun ls poemas i las quadras que screbeis. Esso yá ye ua maneira de ajudar a fazer abançar las cousas… por mais pequeinhas que mos paréçan… mas botando assi i todo… lhibremente !… mesmo que seia an branco cumo aqui neste site yá fui dito ua beç por Fir i cun toda la rezon.

Bien pior serie se nun pudíssemos usufruir desse dreito cumo yá acunteciu an tiempos cumo sabeis i durante ua de las mais longas ditaduras que cunheciu la Ouropa… I l melhor que podemos fazer ye de nunca l squecer !

Fir disse...

Buonas nuites.
Gostei muito do poema.
De facto, é lamentável que não se fale de assuntos muito importantes na campanha, como é o caso da língua mirandesa (e até a língua portuguesa está excluída).
Acho que é importante que cada um vote de acordo com as suas convicções (como a Ana e outros portugueses que residem no estrangeiro já fizeram).
Um abraço.