15/09/09

Sou tue

Quejira you fazer salir de la mie fuonte
las palabras an mundiada, a arramar
i dezir-te que te sinto, te quiero
i que ye ne ls tous braços
que me acunchego i,
ne l'oulor de l tou cuorpo, me perdo.

La fuonte d'augas cristalinas secou-se neste einfierno stibal
i cun eilha secórun-se-me las palabras cun que te querie cantar,
miu Praino scaldante.
Ls mius lábios nun te sunrien de gretados, al mirá-te
i tu miras-me an zaspero, suplicante.

Reguei-te cul miu sudor i cula auga fresca
que saliu de las tues antranhas i,
regado, rejubilabas pula nuite
mas quaijeque te morries pul die,
queimado pul sol, abanado pul aire seco
i te drobabas subre ti mesmo an agonie de muorte,
de zaspero, an pedidos de ajuda,
mirando l cielo a la percura dua nubre
que te traisse chuiba.

Secórun-se-me las palabras cumo te beio a secar, miu Praino…
Querie deixá-te un poema antes de me ir,
un poema que te fazisse sunrir.

Saliu mudo, l miu poema!...
Ye un poema de sentires,
sin palabras, sien métricas, sien rimas.

Nun rima delor, cula falta que me fazes;
nun rima amor, cun ls tous çponeres bermelhones,
cun ls tous nacientes roixos i laranja,
cun ls tous hourizontes an que me deito i sonho,
cula costra dura de l tou pan qu'amolheço
i me mata la fame.

Nun rima stuntear cun ls tous oulores,
eimudecer cun ls tous sonidos,
sonhar cun ls tous siléncios,
drumir nas mantas que me stendes,
sentir cun ls tous sentidos.

Nun te deixo palabras an anciente,
desta fuonte que cuido seca.
Antrego-te la fuonte…
Sou tue, para siempre!...



8 comentários:

Isilda disse...

Buonas tardes Delaidica!

Graças a Dius acá stás tu de nuobo.
Todos ls dies entraba ne l tou Blogue mas senhales de Adelaide, nin bé-la!

Rialmente l nuosso praino stá trite de tan seco que stá, bien percisaba duns buns dies de chuba, para alegrar l campo i tamien las pessonas que yá nun saben cumo gerir tamanha seca.

Beisinhos amiga, staba cun suidades de l tous testos, de l tous poemas.

Isilda

faustino.antao disse...

Oulá amiga Adelaide

-Guapos poema, gustei de ler

-Parabienes

Un beisico
Faustino

AF disse...

Bienbenida Adelaide,

Até este blogue andaba seco por tu nun choberes acá.

bj
AF

Adelaide Monteiro disse...

tamien you andaba seca por falta de las coçquinhas de ls botones de l cumputador.
Ls tiempos emudórun i l praino sien anternete yá nun ye praino!...
Bien haiades a todos, ya tenie muita falta de star cun bós.
bs
Adelaide

"Scacição" disse...

Buonos dies Adelaide,gusto deste nome,ye l nome de mi mai:)

Que poema "antenso",gustei muito.
"Reguei-te cul miu sudor i cula auga fresca
que saliu de las tues antranhas...

Bien haia!

Adelaide Monteiro disse...

Oulá amiga Mirandesa,
Oubrigada pulas tues palabras. Tamien you gusto de l que screbes, cumo diç Bálter, ls tous bersos son de beludo.
L nome de nuossa mãe achamos-l siempres guapo. L de la mie ye Marisé i you tamien acho lindo.
Beisicos,
Adelaide

francisca carvalhal disse...

Buonas nuites Delaide,
Quien ama assi l Praino debia tener ua condecoraçon.
Se naide l fazir, fago-lo you anque seia cun ramico de campaninas.
Beijo
Francisca

Adelaide Monteiro disse...

Adoro campaninas, Francisca! Quedo a spera...
Era cun eilhas a la mistura cun las primaberas que me anfeitaba cun colares quando iba a ser bueira.
Beisico
Adelaide