22/09/09

Lhona - L perdon



Habie un tiu que siempre qu’íba a l’eigreija de la sue tierra, íba cun dues antençones, star a missa i sacar uns centimos de las smolas, un centimos nada mais, nun era muito de la buntade del ser tan pouco, (tanto se ye lhadron roubar un teçton cumo un milhon) que ne ls tiempos que cuórren la cousa tamien nun stá buona pa la caridade, las algibeiras ándan debalde.

Mas la sue cuncéncia inda nun staba çafada de todo i sabie que esses céntimos nun le pertencien éran pa ls mais probes, i por pensar assi rogaba siempre perdon a nuossa Senhora i a Jasus cula pormessa que era la redadeira beç, que s’íba a eilha i de s'eimendar.

L pior era que este bíçio nun tenie cura i el eimenda tamien nó, i cuntinaba a roubar smolas i a pedir perdon.

Até que un die, cumo diç l pobo “tantas bezes l cacharro bai a la bica que un die alhá fica” l sacristan dou pur eilha, i scundiu-se atrás de la státua de Jasus.

L tiu fui-se a las smolas lhimpou la caixica i de seguida an zinolhos delantre de nuossa Senhora pediu perdon.

Fui-se a Jasus i dixo, perdona-me mais ua beç

L sacristan que staba atrás respundiu:

-Nun te perdono…

L tiu nun stubo cun meias medidas i dixo-le:

-Tu inda yes un garoto! Ah! Ah! ….tue mai yá me perdonou.

(Eiqui deixo esta pequeinha lhona, nun quiero oufender a naide, cuido que este spáçio tamien merece alguas de beç anquando, çque séian lhimpas, pa to las eidades i democráticas)


2 comentários:

"Scacição" disse...

Buonos dies Tiu Antonho:)Gustei de ler esta lhona,stá angraçada!

Bien haia!

Antonho Carrasqueiras disse...

Oulá amiga Scacição

Inda bien que gustestes.

Puis, you nun sei s'algue me quedou de l'anfáncia (alborotada) mas sou assi a modos dun "carrancudo", ye çfícele ancuntrar graça nas cousas. Mas cumo tamien sei que tristezas nun págan díbedas, de beç an quando alhá sal algua.
Que esta bida ten que ser cumpuosta, bós ajudais cul guspos poemas, i se son guapos i you botando uas lhérias que nun sei fazer mais nada

Saludos
Antonho Carrasqueiras