13/09/09

Ls teçtemunhos




Quando las eideias se tórnan spúrias, ambaio-me bendo retratos.

Ls retratos son-me joldeiros, eilhes tráien-me al de riba l que quiero i nun quiero, cousas buonas mas tamien chúpan l selumbriu de las mimórias. Cumo buonas, l tiempo peçque arrecula i nistante mos çtápamos l'arca adonde arrecademos un bun cacho de nós, nun sfregante miramos-mos bien defrentes de l que agora somos, tornamos a tener l pelo grande a bitle que partie l coraçon de delor a nuossa mai, mas culas ganas de ganhar repuosta a las piçcadelas de las rapazas, zampenados de barriga, ampimponados cuas calças nuobas de fazienda a boca de campana, camisa çfraldada chenica de froles, postura de fazer ambeija als perus de tie Oulinda. Anchados capazes de poner l dedo molhado na tiesta de l purmeiro farrista fusse el d’acá ou de fuora. Somos l mais guapo de las fiestas i nun faltamos a nanhua, an quadrilha quaije siempre nien las negas de las namoradas mos lhieban a zistir. Anjeitado nunca l tino stá an fazer l nial atrás de l’oureilha daqueilha que tenga mais faziendas. Queremos ampingir spriéncia que nun la tenemos, puis stamos berdes i nun sabemos respigar las peneiras, amouchar la proua que mos anganha i cega.
You tengo rezones de sobra para nun mirar al para trás cun buns uolhos, ou cuidais bós que mirar para aquel tiempo que andaba a rober las códias de la cerrona i ls mius mais bielhos a serbir an casa de ls ricos son buonas de lhembrar!
Nun son nó, la necidade ye armana de la miséria que s’amostra sfarrapada i çcalça, scanzilada i sclética. Quantas bezes miu pai le dixo a mie mai, sabes porque fiç la nuossa casa sien jinelas, porque quando la miséria entra pula puorta l amor sal pur eilhas i you yá adebinaba que la maldita benie eiqui morar i nun quiero que l que gusto de bós salisse
Mas dezie you que gusto de ber retratos, a quelores i tamien a negro i branco que son ralos, las máquinas de retratos éran al tiempo que me criei de l tamanho de la caixa de ls cunferrumes de tiu Demingos çapateiro.
Será que ber retratos de ls antigos ye cumo sonhar cul dantes?
Anton you sou un sonhador mesmo sabendo que sonho cul anfierno, porque sonhar nun fai mal a naide.

Antonho Carrasqueiras



Sem comentários: