05/09/09

La racha





Muito se ten çcutido al lhargo de ls redadeiros anhos la queston d’eigualdade antre ls homes i las mulhieres, que antes de l séren homes son rapazes i las mulhieres rapazes.
Quando se ben al mundo, todos benimos molhadicos, choramingas i la berdadeira çfrença i sola essa ye que las rapazas trázen racha i ls rapazes tapa-rachas.
I cuida-se que assi quédan para siempre.
Mas nun fui siempre assi, al menos ne ls anhos cinquenta de l seclo datrás, ls rapazes passado que era algun tiempo i ampeçában a dar ls purmeiros passicos, passában a tener racha, porque l tapa yá eilhes tenien de fabrico, ou seia las dues cousas.
Déiamos las buoltas que quejirmos a las questones d’eigualdade i ls rapazes tenien mais que las rapazas.
Daba muito jeito esso daba, mirai bós cumo s’iba ua probe mai amanhar cua dúzia de crios todos pequerricos, i habie ties que tenien uns atrás de ls outros, se nun fusse la racha ne ls calçones i nas calças de ls rapazes.
Essa racha era assi un modo de ser andepandiente, l serbício era lhimpo i rápido.
Rapaç anquanto tubisse racha, nun fússen alguns ancumbenientes, nun percisa d’ajudas de naide.
L tiempo passa, mas un rapaç apuis yá nun passa sien la racha, essa ye la berdadeira çfrença.





1 comentário:

AF disse...

Buonas nuites, Antonho,

Finalmente te tenemos na quadrilha, sien ser por anterpuosta pessona.
Sós siempre bien benido, que pessonas cumo tu mos fázen acá muita falta.
Bien haias poor todo.

Un abraço arrochado,
Amadeu