16/02/11

José Maria Morgado


Ls Alcaforros
Atormenta l báfio a sangre rojo i l fraco assopro
que rejiste no tembrar de l cuorpo sacamugindo
la bida que inda sobra de l mal trato de las balas.
Putas balas, maldito fierro i l lhume que las guia
Caras al salagre dun bibir cheno de suonhos
Amboldrigados a chombo i puolo.
Bidas sien alas bótan suables la alma al cielo
Loinge de l campo i de la mai que las biu nacer,
Deloridas, anfadadas, choran siléncios
I ls filhos frius que an arcas negras ban benindo.
Riu arriba, nos aires de Resinales
Bólan alto an remolino ls alcaforros
Seinha de muorte an Barriales,
Chegan brebe las amboras de l tou sangre
Caído loinge, tenhindo fuorte l suolo.

A José Maria Morgado

(natural de Sendin, falhecido an cumbate, an Moçambique, l die 18 de Márcio de 1967)

1 comentário:

AF disse...

Bien haias Abelhon, por lhembrares eiqui a Jesé Moragado, sendinés que matórun na guerra quelonial. Era un rapaç un cachico mais bielho que you, mas que andubo cumigo a scuola i se me lhembra del. Quando passo pula rue de l'Eirmita lhembro-me muita beç del.
Guerra maldita i malditos l que la oumentórun i la muntubírun.

Abraço,
Amadeu