02/02/11

Sei de ls rascunhos


Nun sei que camino hei-de agarrar para seguir, nun sei a qu´aire, nun sei a que calmarie, a que atronada ó scampado anquemende ls passos.
Bibo na antemporalidade de ls suonhos, na permisson de ls dies, no acordo de ls zeinhos que se me sémbran an biaije que se me bai traçando.
Nun quiero l onte, bibo l hoije i, nesse bibir traço ls caminos de l manhana, an zeinhos singelos que se me grában ne l peito, m´atrabéssan l´alma.
Quien sabe se l feturo tenerá tinta na paleta!...
Há-de tener.

Diç-me-lo l rascunho que bou fazendo na alma i que me pide pinceladas desse tiempo que há-de ser tiempo de tamprança.
Nun sei que caminos seguir para chegar, abraçando tiempos de solidones marcadas an riscos lebes para que se báian apagando ne ls dies, nas nuites, ne ls ceponeres, ne ls amanheceres.
Sei de ls rascunhos, sei de l hoije na lhuita por manhana.


7 comentários:

AF disse...

Antoce, que esses rascunhos se buolban an guapos quadros. Stou cierto que si. Bou aguçando ls uolhos.

bs.
A.

ACangueiro disse...

Zeinhan-se uocos floridos ne l çcampado soalheiro; amanheceres amerosos çtapan bolos coloridos.

beiso,

ac

franciscobelharino disse...

Buonos dies Delaide,
Decierto essess rascunhos yá son guapos zeinhos, que apuis se bolberan an quadros cun muita culidade.
Un abraço,
Francisco

Adelaide Monteiro disse...

Son solo gatafunhos para bos dezir que inda ando porqui.

Beisicos, amigos.

Delaide

leonardo antao disse...
Este comentário foi removido pelo autor.
leonardo antao disse...

Buonas nuites Adelaide,
Achei mui antressante este tou testo, an special este cachico:
" Nun quiero l onte, bibo l hoije i, nesse bibir traço ls caminos de l manhana”.
Este mirar pa l feturo, demunstra l tou sprito moço cun eideias abançadas, que nun se prende "ne l miu tiempo era melhor, ne l miu tiempo habie mais respeito..."
Un abraço
Leonardo

Adelaide Monteiro disse...

Olá Lionardo!
Este fui un testo que screbi an pertués yá quantá i que apuis passei-lo para mirandés. Nun gusto de fazer assi porque acho que perde muito de l ancanto que ten se se screbir direto

Bei l oureginal


http://adelaide-monteiro.blogspot.com/search?updated-min=2010-01-01T00%3A00%3A00-08%3A00&updated-max=2011-01-01T00%3A00%3A00-08%3A00&max-results=50 an mirandés.