03/02/11

Para adonde bai l denheiro ?


A la borda de l Mediterráneo, na Tunísia :
la mie pequerrucha, la prima (franco-luso-tunisina)
i ls primos de la prima, filhos de l tio Abd al-Rahaman .
Inda iremos todos a Gabés, Sidi Bou Saïd, Chott el-Jerid, Tozeur i claro a Tunes!

― Ls Tunisinos i ls Eigípcios stan-se a rebuoltar. Nun ye d’admirar! La grande maiorie de ls Eigípcios por eisemplo solo ganha 80 euros por més i eilhes son 80 milhones. Solo ne l Cairo, bíben 20 milhones : dues bezes la populaçon que hai an Pertual.

―Anton eilhes i ls Tunisinos nun aporbéitan todo esse denheiro que trázen ls turistas que bénen de l mundo anteiro, por eisemplo ne l caso de l Eigito para admirar las Pirámides, fazer scurçones ne Nilo ou gozar de las augas calientes de l Mar Burmeilho quando ne ls nuossos países faç friu que un até se pela ?

― Quien aporbeita subretodo son muitas bezes ls « tours operators », todas essas cumpanhies de turismo cun sede muitas bezes ne l strangeiro : cumpanhies anglesas, amaricanas, francesas, alamanas i outras.

― I l denheiro que todos somos oubrigados a pagar yá que muita cundidade de petróleo que cunsumimos cuntina a passar pul canal de Suez i stá sujeita a taxas i dreitos de frunteira que las cumpanhies de petróleo págan antre outros a esse paíç que ye l Eigito ?

― Mui poucas dessas taxas acában pula cierta ne ls bolsos dessa smagadora maiorie de la populaçon eigípcia. Ban para outros sítios : para cuntas bancairas na Suíça por eisemplo.

― Que tristeza ! Nun admira que haba anton estes lhebantamientos, todas estas manifestaçones, giente que grita, que piede mudança i que muorre tamien porque inda hai quien nun querga que las cousas múden… Que tristeza !

3 comentários:

leonardo antao disse...

Buonas nuites Ana,

La pregunta de l títalo deste tou testo fizo-me lhembrar ua sclamaçon que you fiç hai cerca de binte anhos atrás, quando fui acumpanhar l Diretor Giral de Armamiento a ua sposiçon anternacional de material de guerra ne l Cairo, "Olhe miu General, para adonde bai l denheiro de ls Eigípcios!

Ne ls spositores de la Rússia, de la Fráncia, de la América i de la Almanha, berifiquei que ls eigípcios cumprórun ua grande bariadade d'armamiento, carros de cumbate, abiones, mísseis, etc, porque, segundo me dixe un coronel eigítcio, cunsidrában la Defesa i sigurança la purmeira prioridade de l Paíç.

Nun stará agora l pobo a tentar altarar estas prioridades?

Un abraço
Leonardo

Moisés. disse...

Lo peor ye que ye igual en tolos sitios. ¿Ou pensamos que n'Europa nun tán llevándose tamién el nuosu dineru?

Ana disse...

Buonas tardes, Amigos,

Ye mui amportante l que dezis i l buosso testemunho, Leonardo, ye mui balioso.
Cumo tengo ua armana a bibir an Tunes, todo l que se stá a passar neste momento nesses países a sul de l Mediterráneo me chama muito l'atençon. Tamien se passa eigual cun todos ls franceses ou pessonas que móran i trabálhan an França oureginairos de l Norte de África.
Nun hai muito tamien me arrepelou la notícia segundo la qual habie na Tunísia, an proporçon, 10 bezes mais polícias que na França. I esto acaba por tener tamien ua relaçon cun aqueilho que diç, Leonardo. La purmeira prioridade dun paíç nun puode ser l'armamiento!
Mas la França tamien ten probablemente ua parte de respunsabilidade an relaçon a la ditadura que habie na Tunísia i quien stá a ser creticada abertamiente neste momento ye la atual ministra de ls negócios strangeiros...
Sabendo que an tiempos la Tunísia chegou a ser un protetorado de la França...

Un abraço pals dous: Leonardo i Moiso.