15/02/11

Reboluçones !



Para adonde bai l denheiro ? preguntaba you, hai solo 12 dies, a perpósito de las dues reboluçones que decorrírun, nestas redadeiras semanas, na Tunísia i depuis ne l Eigito; mas subretodo a perpósito de la situaçon miserable de la maiorie de ls habitantes desses dous países, an special ls Eigípcios que bibien cun solo 70 ou 80 euros mensales i menos inda quando stában zampregados i debien de se sujeitar cun ua média de solo 40 euros…

Para adonde iba l denheiro anton yá que esses dous países son tanto un cumo outro por eisemplo mui frequentados por turistas de l mundo anteiro sien falar de outras fuontes de riqueza subretodo ne l caso de l Eigito ?
La respuosta chegou nestes dies i até nien tardou, cumo por milagre: pals bolsos desses dous ditadores que dirigien esses dous países sien que ningun de ls sous cuncidadanos pudisse poner esso an causa sien correr l risco de represálias i de tal maneira ls anchírun (esses dous, i quien sabe tamien outros mesmo al lhado…) que acabórun por se tornar nada mais nada menos que multimilionários: antre las pessonas las mais ricas de l mundo!

Nun serbiu por eisemplo para ser repartido antre ls 80 milhones de habitantes que cunta l Eigito mas para fazer desse faraó que gobernou esse paíç, durante estes 30 últimos anhos, segundo l diário británico Guardian: un de ls homes mais ricos de l mundo, tan rico ou mais que Carlos Slim i Bill Gates !

Que tristeza ! dezie you, bai a fazer 12 dies…
Mas hoije, un só se puode sentir mais rebuoltado inda i dezir bien alto : Que scándalo ! Ten bien rezon l pobo eigípcio de se rebuoltar i só podemos sperar, todos i sien eiceçon, que outros pobos, outras gientes, outros países, téngan tamien la coraige de fazer eigual… i nós, tamien ! ou pensais que nó ?

Mas l miu testo hoije bai a ser curto…

Ye curto... anton Buonas Nuites !


3 comentários:

Adelaide Monteiro disse...

Ye curto, claro, ouportuno, refletido. Cumo dében ser, Ana.
De pouco l baliu zbiar tanto, l persidente de l Eigito yá stá mais para alhá que para acá.
Ua pouca de justiçia, talbeç, eironie de l çtino...

leonardo antao disse...

Buonas nuites Ana,

Apesar de l scándaloso anriquecimiento “desse faraó que gobernou esse paíç, durante estes 30 radadeiros anhos”, ls eigípcios amostrórun que son un pobo fabuloso. Dórun un amportante testemunho para to l mundo, fazirun ua reboluçon cíbica, pacífica i ne l final lhimpórun las rues.

Cun este tipo de reboluçon, nun staran ls eigípcios a ajudar a cuntribuir pa la custruçon dun nuobo mundo árabe, mais justo i mais pacífico?

Un abraço
Leonardo

Ana disse...

Bien háiades, Adelaide i Leonardo, i speremos todos juntos que si: que deixemos als nuossos filhos i nietos pul menos un mundo an que nun haba anjustiças cumo las que inda hai ne ls dies d’ hoije: anjustiças terribles i einimaginables! Por esso estas dues reboluçones trázen cun eilhas la sprança que las cousas múden assi i todo i múden para bibirmos todos nun mundo melhor.

Un abraço tamien para bós