21/02/11

Tan curtico!



Todo ye siléncio nesta madrugada frie. Botei l nariç de fuora i, cun la cisca, chegaba d´horas an quando un sonido mui sumido i ambergonhado que me parece de algun lhato que tenga quedado çquecido an riba de algua árbole, daqueilhes que se pónen para spantar ls paixaros. Tirando isso, todo ye siléncio a esta hora, cedo para ls galhos cantáren i las campanas tocáren las trindades.
La lhuna mira alhá ne l alto de l cielo, la mie sola cumpanha quando me abinturei a botar l cuorpo fuora de casa.
Eiqui nesta sala adonde eizercito ls dedos, solo ls botones de cumputador fálan, al modo que ban botando letras na pantalha.
Talbeç por tener soudades de screbir, l sentido spertou apuis de menos de dues horas de suonho.
Dous spirros retumbórun na sala, nacidos de l friu que me mana ne l bidro a tapar l trilho que serbiu para mesa de sala de quemer. Tapei-lo cun la bolsa de l cumputador pa que l friu nun me atrece i cun el nun me naça un custipado.
Nien sei l quei salirá deste casamento de botones i dedos, al modo que bou screbindo cumo quien camina sien saber para adonde, talbeç nun caminar ancunciente adreitos al Froles que a las bezes chama pul miu nome sien que you l responda.
Deixa-me an paç, tengo-l respondido algua beç… Tengo ls dedos ambaídos cun outras labouras i deste sentido anriba de la lhuna nun hai letra que abrolhe.
Agora ne l miu bércio, adonde bin zde que me cheirou a cordeiro de la fiesta de ls sabores, peç que si yá me dou para isto.
Claro que nó!
Nun ye perciso cordeiro nien fiesta de sabores para you ancarar adreitos acá…
Staba buono l guisado, cun l gusto a ls pimientos burmeilhos, a la cebolha i a las batatas que eiqui son manjares. Tan buono cumo deberseficada i buona éran las cumpanhas de la mesa i de l fin de sumana: Dous mirandeses, un filho de ls mirandeses, un de Bizeu, ua eitaliana, ua galhega, ua alemana.
Cordeiro, posta, fumeiro, bolha doce, passeio nas arribas de Aldeia Nuoba, passeio ne l riu, lhume ne ls seranos na Speciosa; todo ua marabilha, para eilhes i para nós.
Mundo sien frunteiras que trai a Miranda i a la Speciosa giente de todos ls sítios, giente que queda marabelhada cun las belhezas naturales i la paç que eiqui bén a buer.
Que pena que fui tan curtico, dezírun.
Tornai siempre que quérgadas. Afin de cuontas,
de Coimbra eiqui nun ye mui loinge…


2 comentários:

franciscobelharino disse...

Buono dies Delaide,
Carai, lhougo a la purmanhana al lher este tou testo tan guapo subre l praino i subre l guisado esse de cordeiro, anté se fai auga na boca a un.
Un beiso miu i d' Eirene,
Francisco

Adelaide Monteiro disse...

Se fai, Francisco!
La eideia ye mesmo essa, para ber se la paixarada bai benindo mais bezes.
Hoije stá mais friu do que nos dies atrasados, mas assi i todo custa-me tanto a ir...

Beisicos a bós tamien.