14/02/11

Las quatro regras de l blogue frolesmirandesas


Deixo eiqui, mais ua beç, la mensaige que pus l die 13/01/2008, passórun hai pouco trés anhos, respeitante a las regras a seguir neste blogue. Essas regras stan atuales i ténen que ser respeitadas custe l que custar i custe a quien custar.

Nessa altura naide cuntrariou las regras, que fúrun puostas a cunsulta pública, i portanto son regras aceites por toda la quadrilha. Respeitá-las ye la única cundiçon de lhibardade deste blogue, que ten proua de ser un blogue lhibre i de respeito pula lhibardade. Mas esta nun puode ir contra aqueilhas regras. Se alguien nun stubir d'acuordo, ende solo le queda un camino, que ye l de criar l sou próprio blogue [sei de l que falo puis you própio tengo bários blogues adonde scribo l que me dá la gana].

La regra que mais ten stado an risco de biolaçon ye la regra 4.ª i apagarei todas las mensaiges que séian contra eilha, cumo stá prebisto. Assi fiç hoije i cuntinarei a fazer deiqui palantre, puis ye miu deber mantener l respeito pulas regras aceites por todos. Çcutir eideias, todas las eideias i de modo fuorte, mas siempre respeitar las pessonas.

Se assi nun fur, este blogue stará a ser çtruído i nun durará muito tiempo. Por esso le pido a todos que eibíten este tipo de anterbençones que, anque neçairas, son siempre zagradables.


-------------------------


L testo de 13/08/2008 era l seguinte:


Quando este blogue ampeçou, aperpus trés regras a respeitar. Beio que ye neçairo acrecentá-le ua 4ª.

Quando ampecemos l blogue, nun fui possible poner estas regras a cunsulta de todo mundo. Eiqui quédan a cunsulta de todas/os, podendo dar-se eideias de outras regras ou de modeficaçones nestas que se aperpónen. Las regras ténen que ser poucas i claras. Béngan, anton las buossas oupeniones, nien que seia solo para dezir que stais de acordo. Assi todos quedaremos mais cuncientes.

Spero que este blogue cuntine a dar froles cada beç mais bistosas i cheirosas, que hónren la nuossa lhéngua mirandesa i cada ua/un de nós.



Regras a respeitar:

1ª screbir solo an mirandés, cunsante la Cumbençon de la Lhéngua i sue 1ª Adenda;
2ª respeitar la lhéngua i la cultura mirandesas;
3ª ser a fabor de todas las pessonas, nun indo por caminos de racismo i outras neguilhas aparecidas, cuntrairas a la houmanidade;
4ª çcutir eideias i nunca çcutir ou atacar pessonas.




Procedimentos:

- quien nun respeitar estas regras berá ls sous testos apagados;
- se alguien se sentir oufendida/o, debe de falar cul admenistrador de l blogue antes de fazer algo i star abierta/o a resolber l causo a bien.



2 comentários:

leonardo antao disse...

Buonas nuites amigos de la Quadrilha de l Frolesmirandesas,

Nunca deixeis de ler, reler i respeitar estas las quatro regras de l blogue Frolesmirandesas, porque eilhas son ua spece de tesouro que mos ajuda a bibir melhor i mais felizes. Somos todos amperfeitos i tenemos de bibir cun i cumo amperfeitos, mas eibitando siempre çrespeitar estas quatro regras.

Repito eiqui alguas de las palabras que meti ne l comentairo, ambaixo, al testo “Declaraçon d’amor, “se l mirandés ye un balor acrecentado pa l Pertués, l blogue Frolesmirandesas ye un amportante balor para promober i dibulgar la lhéngua i l patrimonho cultural i stórico mirandés.

Cuntinarmos a botar pa l Frolesmirandesas milhones de palabras que mos bénen la eideia, ye prestarmos ua houmenaige al pobo mirandés que mos deixou esta hardança de ancalculable balor, la lhéngua mirandesa.

Ls noussos melhores agradecimientos a Amadeu, por mos relhembrar las regras i por mos ajudar la respeitá-las.

Un abraço,
Leonardo

Ana disse...

Só ua cousa :

SARAMAGO (único prémio Nóbel de lhiteratura pertuesa até hoije!) acabou por tomar la decison de ir bibir fuora de l paíç del. Talbeç esso nun tenga amportáncia ningua para alguas pessonas i talbeç até para la grande maiorie... mas para outras, esso si ten amportáncia!