19/02/11

Eitália: Curcefícios çpregados !


« Se na Eitália, l catolicismo deixou de ser oufecialmente relegion de Stado zde 1984, ls decretos adotados ne ls anhos 20 pul regime mussoliniano que outorizában la sposiçon de l curcefício nas salas de aulas cuntinában an bigor. L Tribunal Ouropeu de ls Dreitos Houmanos (TODH) acaba de cundenar l’Eitália oubrigando-la a tirar todos ls curcefícios an nome de l artigo 9 de la Cumbençon de ls Dreitos Houmanos subre la Lhibardade de Pensamiento i de Cuncéncia. L TODH cunsiderou por acaso por ounanimidade que l curcefício "restringe l dreito de ls pais de eiducar ls sous filhos cunsante las sues cumbiçones assi cumo l dreito de las crianças scolarizadas de acraditar ou nun acraditar". L Stado eitaliano ten trés meses para pedir ua segunda anstáncia, antes de ser oubrigado a çpregar dezenas de miles de curcefícios nas salas de aulas. »

Fenêtres sur.cours, 19 de Nobembre de 2009, n° 334, ISSN 1241-0497
(rebista francesa que eidita la FSU (Fédération Syndicale Unitaire), ua de las federaçones de sindicatos de porsores mais amportantes que eisiste an França de que de sou membro hai mais de binte anhos)

[I an francés, ne l oureginal,

Italie : crucifix décrochés

Si en Italie, le catholicisme n’est officiellement plus religion d’Etat depuis 1984, les décrets adoptés dans les années 20 par le régime mussollinien permettant l’exposition du crucifix dans les salles de classe restaient en vigueur. La Cour Européenne des Droits de l’Homme (CEDH) vient de condamner l’Italie à retirer tous les crucifix au nom de l’article 9 de la Convention des droits de l’homme sur la liberté de pensée et de conscience. La CEDH a ainsi estimé à l’unanimité que le crucifix « restreint le droit des parents d’éduquer leurs enfants selon leurs convictions ainsi que le droit des enfants scolarisés de croire ou de ne pas croire ». L’Etat italien a trois mois pour faire appel, avant de devoir décrocher des dizaines de milliers de crucifix dans les salles de classe. ]

Esta ambora quando la li, hai yá mais dun anho afinal, chamou-me eimediatamiente l’atençon.
Na mesma altura, dei-me de cunta que tamien an Pertual se falaba an casos i tentatibas de la parte de l Eigreija de cuntinar, cumo durante todo esse período que representou l Stado Nuobo, a eicercer anfluéncia i tamien poder até nas scuolas i subre crianças, quier dezir : menores que son muitas bezes i quaije siempre cumo todos nós sabemos, inda mui anfluanciables…

La única beç que mie mai me mandou para l cumbento/asilo an Sendin, tenie you solo quatro anhos, i poucos dies depuis yá mos íbamos para la França… nesse die, fui mais ua prima que tenie un anho mais que you. I antes d’irmos, lhougo pula manhana, mie mai inda le preguntou a mie prima se habie quemido qualquiera cousa… Que si, respundiu eilha… I l que quemiste ? inda quijo ansistir mie mai… Ua castanha, tia, solo quemi ua castanha !

Nunca mais se me squeciu esse die… i depuis mais dua beç me chamou tamien muito à l'atençon l sentido corriente mas terrible i negatibo que ten la palabra francesa ("un asile" an francés ye antes de mais nada un spital psiquiátrico!) que mais se aparece cun essa, « l asilo », que se usaba tanto assi i todo, por eisemplo an Sendin, para falar desse eidifício i tamien anstituiçon que acolhie, puls menos nesses anhos 60, garoticas que solo tenien 4 ou 5 anhos de eidade…

I hoije, hai quien inda querga dar a la « Casa de la Criança» ou tamien al lar pals idosos que alhá eisisten l nome de «Lar de la Eimaculada Cunceiçon»…

Cun que anton!

8 comentários:

leonardo antao disse...

Buonas nuites Ana,

Para mi ye scándaloso saber que nun Paíç cumo Eitália, adonde bibe la Cabeça de la Eigreija católica, se crian lheis para “oubrigar a çpregar dezenas de miles de curcefícios nas salas d'aulas”.

Cumprendo este çpregar a quien naide dixe que l Senhor que stá ne l curcefício, fui curceficado porque mos bieno pedir para “mos amarmos uns als outros” i assi custruirmos un mundo mais justo i mais mais pacífico.

Nun será por esso que bemos tantas pessonas “caídas na baleta” pula falta d'amor i pula andiferença de muitos? Caídos pul abandono de ls fameliares i amigos, pula solidon, pul zamprego, pula marginalizaçon…?

Cun este tipo de lhegislaçon nun staran ls Eitalianos a cuntribuir pa la custruçon dun mundo cun mais pessonas “caídas na baleta”, mais anjusto i mais desumano?

Agradeço-bos Ana esta escandalosa ambora que me fizo pensar ne l curcefício, i ne l Amor.

Un abraço
Leonardo

Ana disse...
Este comentário foi removido pelo autor.
Ana disse...

Buonas tardes, Leonardo,

La LAICIDADE debe de ser cunsiderada cumo un de ls balores fundamentales de la DEMOCRACIE i cumo tal respeitada i até defendida por TODOS.

Cumprimentos

leonardo antao disse...

Buonas nuites Ana,

Stou d'acuordo cul que dizes, mas nun podemos cruzar ls braços quando ua perseguiçon subtil cundena la Eigreija a morrer d'inaniçon, relegando-la para fura de la bida pública i, subretodo ampedindo-la d'anterbir na eiducaçon, na cultura i na bida fameliar.

La lhibardade de religion ye un de ls balores fundamentales de las democracies i defendida por todas las outénticas democracies, mas ye chocante la frequéncia cun que, (an nome de la lhibardade!) tantos países se ouponen a que ls católicos séian pura i simplesmente católicos i fágan deilhes tantos márteres.

Nunca debemos tentar amponer als outros las nuossas cumbiçones relegiosas “La Casa de miu Pai ten muitas moradas” dixe Jasus. L'amportante ye l'amor “ama i fai l que quejires” dixe Santo Agostinho. Eiqui stá l ccamino de paç i la felcidade para ua buona laicidade.

Un abraço
Leonardo

Zzç disse...

Se isto fusse l facebook daba-le al boton "Gusta-me" porque stou sien anspiraçon para screbir algo.

Pus isso, solo querie dezir que me gustou :)

Cuncordo cumpletamente cun Ana, i tamien cunconrdo cun Leonardo quando diç que "L'amportante ye l'amor".

Nun precisamos de crucefixos ou religiones para apergoar l'amor. Ye buono tener ua religion que nos guia, mas nun fai falta.
I menos dua ourganizaçon cun tantas falhas cumo ye la católica...

Ana Maria disse...

Leonardo, nun bos anganheis !

Nun se trata de perseguiçon mas de respeito de la LEGISLAÇON.

Tamien faç parte por eisemplo de la Custituiçon Pertuesa atual la lei de separaçon de las eigreijas (ne l plural) i outras quemuninades religiosas cun l Stado (i neste caso cun S grande!)

Ye assi i ye melhor que assi seia porque ye l que tamien permitiu eibitar i inda permite nas nuossas democracies que deixasse de haber guerras cumo las que houbo muitas bezes, i terribles essas!, que se criórun muitas bezes tamien por rezones religiosas.

Ye que las cousas son mais cumplicadas que l que un pensa, sabeis.

leonardo antao disse...

Buonas nuites Zzç,

Oubrigado pul buosso comentairo. Las religiones son ua criaçon de ls homes. Para bibirmos feliçs basta coincermos i aplicarmos bien dous berbos, AMAR i SERBIR, a todos i a todo.

Un abraço
Leonardo

leonardo antao disse...

Buonas nuites Ana,

Sei de la stória melitar, que ls países cun mais guerras i mais cunflitos anternos i sternos son ls que nun ténen na Custituiçon la lhei de separaçon de las eigreijas cun l Stado.

Ye ua grandessíssima berdade esta tua afirmaçon “ ye melhor qu'assi seia porque ye l que tamien permitiu eibitar i inda permite nas nuossas democracies que deixasse d'haber guerras cumo las qu'houbo muitas bezes”.

Ne l ámbito profissional, sei que pa la manutençon i l reforço de la política Ouropeia de Sigurança i Defesa ye mui amportante que las religiones se mantengan andependientes i apartadas de la política.

Para nós, ls de la ária de la defesa i sigurança, esta separaçon ye amportantíssema para assegurarmos la cumbibéncia pacífica de todas las Eigreijas, de todas las Quemuninades Relegiosas i todo l pobo.

Ls países que nun ténen esta separaçon de la política cula religion, ancontran muitos oustaclos i muita deficuldade para mantener la sigurança, la coeson i la deciplina de las sues populaçones.

Agradeço l tou sclarecimiento i ua beç mais, Ana, recibe un abraço solidairo de l tou siempre amigo,

Leonardo