02/07/10

Tu yes un mouro




You nien siempre ando por ende de monco caído queixando-me de la mala bida que tengo ou tube, até se calha nun mereço melhor puis fui siempre un calafrau, i a mirar puls modos cumo me portaba tube l que merecie.

A ber bien las cousas nunca tube buonas relaçones culas debindades, puis un stá da bien cun Dius ou cul Diabro, fui assi que siempre pensei, i cuido que todo ben dende. Siempre resmunguei, quiç siempre fazer l que me dou la gana, chegando a tener acuontra to l mundo. I esse mesmo mafarrico que metie miedo a meimundo, you até cheguei a cuidar que serie un bun parceiro, porque quando bie las anjustícias i maldades, an beç de dezir que Dius nun drume you dezie que l diabro staba eili a la purmeira squina para las cobrar.

Mas to l mundo sabie i sabe que you sou assi, zde pequeinho que resmungo, naide stubo nien stá anganhado a miu respeito, essa cousa de ser bunsico, de fai de cuonta que nun bes, que nun sabes, que nun ye cuntigo, fai cumo bires fazer, de marie bai culas outras, de me calhar nunca fui cumigo, stá mal stá mal, mesmo quesso me fusse cobrado a lhambadas.

Tamien cumo puoden las debindades aturar un azedo deste, cumo puode la Santa Padroeira gustar de mi que quando mie mai Sabel mandaba medir ls alqueires de trigo para pagar las pormessas porque l sou filho Eimilio nun fui pa la guerra i Foustino mais Zemarcelino nun se muorrirun no Ultramar, you dezie lhougo que fussen mal medidos, porque Nuossa Senhora percisaba menos que la casa de tiu Jesé Gregorio (nuosso pai)?

Cumo puode San Ceriaco gustar de mi, apuis de you resmungar porque miu pai lhebaba las patas(yá curadas ne l fumeiro) de ls cochinos que habie pormetido, quando fui you i ls mius armanos i armana que siempre apanhemos las berças, las patatas, l pan que dou ls farelos, pelemos la fuolha de ls uolmos pa la bianda que ls fazie cebados?
Cuido que ye por essas i por outras que las cousas nunca corrien bien pa l miu lhado, se agora un yá puode falar nesse tiempo tenie que quedar calhado.
-Era un mouro, era assi que miu pai dezie muitas bezes, ” tu nun acreditas an nada, sós un mouro”.
Staba buono de ber que you resmungaba:
Mas pai, acrecenteba you:
- ls Santos i Santas nun stan acá para tomar cuonta de ls nuossos cochinos, nien de las bacas, nien de las canhonas, eilhes nun son pastores nien buieiros, nun fázen la guerra a naide, quien mata ye la fame, la guerra ben de la ganáncia de ls homes.
Assi l mundo de ls homes fusse justo, sien ambeija, armano i fraterno i teneriemos fartura i paç.
I you serie cumpreendido por muitos.


Nota: Quando mui pai me chamaba “Mouro”querie dezir que you nun tenie fé na religion. Porque Mouro, ye un andebido que nun stá batizado, you si stou, un andebido anfiel, you sou fiel a la berdade i acuontra l’eipocresie, Mouro quier dezir tamien un andebido trabalhador, dende se dezir ”tabalha que nien un Mouro”, tamien se cháman Mouros, als moradores de la Mouritánia i tamien ye relatibo al povo “ Mouro” cumo nun puodie deixar de ser.

Sem comentários: