25/07/10

NA OURGÊNCIA

La bida ten que ser assi
Siempre a camino de la ourgéncia
Sufrendo terribles delores
I aguantando cun pacéncia


Buolta i meia, stou alhá
Bendo to aqueilhas maleitas
I bendo las anfermeiras
Fazendo las sues colheitas


De sangre para analisar
Para ber cumo la giente stá
I la giente deitada nas macas
Aguantando-las i yá stá


L doutor, diç, quei te duol
De quei te stás, a queixar
Ben lhougo ua anfermeira
Bou a tener que te picar


Ye para puoner l cateter
Ye só ua picadelica
Mas la anfermeira era nuoba
Nun acertaba, la cuitadeica


Aquilho qu´era para ser ua picada
Birórun uas quantas ferronadas
I nada de salir la sangre
Staban las torneiras cerradas


Outra, que passaba por perto
Se oufreciu para ajudar
Aguanta alhá Jantonho
Que mais ua bais a lhebar


Dues palmadicas ne l braço
Pa la bena aparecer
I sien you me dar de conta
L sangre staba a correr


Pus quien sabe, sabe
Quien nun sabe ten que d´aprander
Que, quien ben a la ourgência
Yá sabe que ten que sufrer


Alhá ben outra beç l doutor
Repetindo la cantiga
Isso nun ye nada de mais
Ye ua anfeçon na bexiga


Aguantei puoli to l die
Deitado naqueilha ourrgéncia
Toma este antibiótico
E spera cun pacéncia


Anquanto isso, entra un
Que habie caido de l trator
I alhá bai l probe cuitado
Desta bida para outra melhor


Entra outro boziando
Diç, l doutor quei se passou
Caie dun telhado abaixo
Mas este alhá se safou


Era l sou die de suorte
Ó tenie ls santos de l sou lhado
Porque se nun fuora assi
Starie el bien arranjado


Bien arranjado, staba you
Scuitando aqueilhes gemidos
I mais outro que entraba
Yá de sentidos perdidos


Anté que, outra doutora
Puoli fui a arrastrar la assa
Dixe, desta te lhibres-te
Bou-te a mandar para casa


Isso nun ye nada de mais
Depriessa bai a passar
Tomas estes cumprimidos
Un por die, anté acabar


Bieno anton l miu bombeiro
Que you tenie perferéncia
I fui assi que deixei
Mais un die naqueilha ourgéncia




José António Esteves

3 comentários:

ACangueiro disse...

Biba, tiu Jantonho,

Yá quantá que nun benieis eiqui. La çcriçone está buona, inté parece un filme mas fartorun-se de bos picar. Las buossas melhoras,

un abraço,

antonho cangueiro

AF disse...

Buonas nuites, amigo Jantonho,

Muito mos cuntais, de la salude. Beio que la buossa falta por estes sítios ten sido cousa mala.
Bienbenido outra beç i que saneis debrebe i sien necidade de tornar tan debrebe a essa ourgença.


Un abraço amigo,
Amadeu Ferreira

José Esteves disse...

Buonos dies pa ls dous. Cumo diç l doutor nun ye nada de mais, ua anfeçon que de quando an beç aparece, i alhá tengo que ir a la ourgéncia, mas to stá a ir bien. Muita suorte i salude para bós. Abraços

José António Esteves