19/07/10

Oulimpíadas Çportibas Mirandesas





Onte, apesar de l die ser um deimingo mui ancalmado, nun fui oubstáculo a mais uas Oulimpíadas Çportibas Mirandesas, que cuntoran yá la XI eidiçon.
Giente de todo l cunceilho, porque este eibento ye mesmo para todos ls mirandeses, marcoran presencia nun de ls lhugares que mais atrai las gientes de l Praino, la Senhora de l Naso. Este lhugar ye sin dúbida mui agradable e spacioso, i nun haberá outro cun cundiçones eiguals par las práticas çportibas que enquadran estas oulimpíadas de l çporto.
Todas las freguesies de l conceilho se apresentoran para cumpetir nas bárias modadlidades aprepuostas a la cumpetiçon. Se bien que se trate de jogos tradicionals, cumo: Fito, Barra (reilha, fierro i piedra), Raiola, Corrida de Sacos, Çueca, Damas ou l Puxar de la Cuorda, parece-me a mi na mie eignorância, que quedoran de fuora tamien outros jogos que se jogaban datrás, que tan populares eran antre la garotada i que se puodien tamien anquadrar nestes eibentos.
Quien nun se lhembra de la Belharda? de la Ua de la Mula? de l Pion? de Saca Barra? de las Palombas? ls jogos de ruoda i tantos outros que se jogaban antes de haber la troubison?
La Câmara prepon a las Juntas de Freguesie que ourganizan ls concurrientes para çputar ls jogos, mas julgo you i se calhar eirradamente, que falta articulaçon cum las Associaçones Culturals, que tenen dreito i oubrigaçon de zelar por este património cultural, que se deben ampenhar an fazer ua recuolha de toda esta riqueza que stá na bias de zaparcer.
Parabienes a la Câmara Munecipal por se anteressar tan eifusibamente neste aspecto cultural, a las Juntas de Freguesie i a todos quantos parteciporan an tan grande fiesta, porque fui isso mesmo.


Sin amportar quien ganhou mais ou menos, todos nós ganhemos un die zfrente i mui agradable.

1 comentário:

franciscobelharino disse...

Buonas tardes Felç,

Faziste bien dar esta ambora de ls jogos tradicionales que tubírun lhugar ne l Naso i, puls guapos retratos. Acho que tenes rezon quando dizes que debie haber outros jogos que datrás eran jogados puls garotos. Quanto a las Associaçones cuido que nun debien quedar arredadas i ténen que trabalhar an parcerie cun las Juntas de Freguesie i Câmara Municipal, nesses i noutros eibentos i nun puxar cada ua pa l sou lhado.
Un abraço,
Francisco