11/07/10

III Ancuontro de Bloguers - Porgrama











Retratos antigos de las Grutas de Santo Adrian
Eimaige de l cartaç - Pintura de Balbina Mendes


Calhando, cumo naide daba nobidades, cuidábades que astanho yá nun habie Ancuontro de Bloguers Mirandeses. Anganhestes-bos. Ye die 21 de Agosto i anté yá ten porgrama i todo. Querendo podeis-lo ber eiqui, quando nó, you copio l scrito i pongo-lo eiqui ambaixo.


L III Ancuontro de Bloguers Mirandeses yá ten porgrama. Nun bos squéçades que ye die 21 de Agosto i que quien quejir quemer de l jantar ten que se anscrebir: l précio son 15 ouros, i l ranxeiro ye l de l anho atrasado; para bos anscrebirdes, podeis deixar eiqui ua mansaige ó anton telfonar para l nº 961800909.
La lista de las anscriçones stá a medrar. Stamos cuntentos que l Ancuontro yá ten sainete anternacional: hai 3 anscriçones de porsores spanholes i al menos 2 son falantes de Mirandés.
La Cámara Munecipal tamien partecipa, mormiente nas "Cumbersas an Mirandés" (quien nun soubir de l que se trata puode-se assomar eiqui). L tema sumbreiro ye "L Mirandés na era degetal", para quien quejir ir purparando ls amprobisos.
Quien quejir bai por San Pedro, quien nun quejir bai solo para la Senhora, mas apuis ten de andar a procurar cumo se passou. De San Pedro para la Senhora tamien se puode ir de a pie ó a cabalho, yá bedes que ye todo a la buntade de l fragués.
Bah, oupa, nun bos squéçades de l'anscriçon, se nó apuis l ranxo puode nun chegar als caneiros.
Queda eiqui l porgrama:


III Ancuontro de Bloguers Mirandeses
21 de Agosto de 2010

Senhora de l Resairo - Minas de Santo Adrian


10.00h - - Recepçon als partecipantes an San Pedro de la Silba
- Palabras de buonas-benidas de l Persidente de la Junta
- Besita a San Pedro de la Silba
11.30h - Salida para la Senhora de l Resairo, cun assomadela al Poço de la Filadeira (quien quejir bai de a pie, quien quejir bai de a cabalho, ls carros pássan bien pul camino)
13.00h – Jantar (précio 15,00€ por pessona)
15.00h - "Cumbersas an Mirandés" - L Mirandés na era degetal
17.00h - Jogos Tradecionales /Gaita, Caixa i Bombo /Besita a las Minas de Sto. Adrian

Anscriçones an: http://bloguersnopraino.blogspot.com
ó
talf. 961800909

Ah, i inda más ua cousica: quando tornardes a la sierra d'Aire, scusais de quedar tan admirados cun tanta stalaquenunseiquei... ai que lindo, ai Jasus Senhora!... Podeis-le dezir: Bah, la cumenéncia! Bacatela! Na mie tierra tamien hai disto - i bien más guapas! - mas cumo tenemos tanta marabilha, cousas desta culidade nisequiera bal la pena çtapá-le la antrada.

2 comentários:

Nial de la Boubielha disse...

-L'Admenistraçon de l site www.nialdelaboubielha.org, spácio pertencente a l'Associaçon Cultural i Recreatiba Nial de la Boubielha (ACRNB)siempre fizo refréncias a estas atebidades culturales i lhénguisticas, i bien debrebe a esta fizo aluson adonde tubo arrimado a quenhientas besitas até l die d'hoije.

-Cumo ye sou deber de nuobo bai a fazer la dibulgaçon na cara de l site (purmeira páigina) de o "III Ancuontro de ls bloguers Mirandeses", quier assi dar l sou cuntributo para que l'anformaçon seia l mais lharga possible, i to ls sous associados i lheitores sában.

-Pul nuosso lhado al saber de l porgrama i de l lhocal cuidamos que ten todo l que ye perciso para que la cunfraternizaçon, l cumbíbio i la lhéngua mirandesa sálgan mais fuortes i mais ricas.

- Todo faremos para que muitos associados, familiares i amigos stéian persentes.

Saludos para todos

L'Admenistraçon de l site

franciscobelharino disse...

Buonas tardes amigo Faustino,

Oubrigado por mais ua beç ajudares a dibulgar ne l Nial este eibento, que decierto será mais un acuntecimiento amportante pa la lhéngua i pa ls sous partecipantes. L porgrama ye tantador i por isso bamos a star alhá cun toda la fuorça.
Un abraço,
Francisco