31/07/10

LAS BUOLTAS QUE L LHEBOU

Depuis de l haber arramado
El naciu, i alhá se criou
Fui seguindo, l sou curso
Anté l die que se secou


Depuis de se haber secado
Era la hora de l apanhar
Ye chegada la hora
De mos botar a cegar


Alhá bai un pul termo
Dobradico por aqueilhas stalhas
Fazendo grietas nas manos
De las roçadelas de las palhas


De las palhas, i dels cardos
E de las gatunhas tamien
Las manos quedaban anchadas
De tantos picos que se l metien


Apierta eiqui, apierta eilhi
Abraçando ls manolhos
Cumo se fussan rapazas solteiras
Que iban quedando nels restrolhos


Lhougo depuis habie que junta-los
Cun carino i cun maneiras
Para depuis ls carregar ne l carro
I lhebalos pa las eiras


Deixa-los nun bornal
Para depuis ls spalhar
I culas bacas i ls trilhos
A las buoltas pals trilhar


Bira parqui, bira palhi
La parba hai que ajuntar
I sprar que faziesse un airico
Para depuis la lhiempar


Apartado l pan de la palha
Yá l sol queimaba cumo ua brasa
Depuis de l meter ne ls sacos
Lhieban-se anton para casa


L grano bai pa l molino
I de farina, pa la peneira
Juntasse-le auga sal, i furmiento
I queda a drumir na masseira


Depuis dua buona soneca
Al spertar, bai a cozer
Terminada esta funçon
Stará pronto para quemer


Calantico ó miesmo friu
To mundo de l gustou
Mas para el chegar eiqui
Las buoltas que l lhebou




José António Esteves

2 comentários:

Júlio Augusto da Igreja disse...

Sodes mesmo un home que mos fazeis lembrar an pormenor las buoltas que l´pan lhebaba.You biem me lembro de lá sementeira; de l'arico; de lá segada; de lá acarreio; de lá trilha;(i aparbonar quando tronaba!! ...)e de lá lhimpa (que acababa an fiesta animada...). Este bousso trabalho quedará para siempre a lembrar lá bida de los noussos antepassados e anriquecer l´nousso mirandês. Parbenes tio Antonho.

José Esteves disse...

Buonos dies. Rialidades bibidas nunca se squecen. I recuordar ye bibir.
Un abraço tio Igreja.

José António Esteves