04/07/10

Ne ls remissacos de l tiempo

Mora an mi ua andorina, aqueilha andorina que spreitaba l miu bózio ne l puial de la jinela de l quarto que me serbiu de maternidade.
Nien doutor nien anfermeira, nien anxobal de princesa.
Solo uas manos doces me aparórun ne l bózio que me fizo giente, quando agachada, mie mai me botou a caras al sobrado, sfregado cun auga i xabon de barra.
Era Maio. A la hora de la salidada de la scuola. Nun se me lhembra que tiempo fazie, mas era l tiempo an que andorinas, sien parar amanhában ls niales de ls arrombos las eimbernadas.
Íban cun sou bolar a remissacos, rentes al chano para debrebe chubíren als cielos, acarriando l barro de l ribeiro ou de l foio de tierra burmeilha, barro cun que se fazie la teilha ne l forno de la teilha de la Funtásia. Inda se me lembra de l ber a botar fumo anquanto se iba arrefecendo la teilha.
Beio-te andorina i sinto-te an mi, cumo sinto ls telhados, todos eigualicos, teilhas sculpidas cun amor.
Hai ua andorina an mie, anque parecendo prouista, ye cumo bioleta a la borda de l camino.
Hai ua andorina que ten sede de mundo i abinturas i, assi i todo, ten an sou peito esses telhados, arrincados sien duolo nien piadade a las casas baixicas cun sues teilhas de bidro eiqui i acolhá cumo candeias a gás, aqueilha de l tiempo an que solo la lhuna daba claridade a la nuite.
Serei mofo daqueilhes telhados, berde, dóndio, adonde ls paixaricos poetas, saltaricában para mais bien béren la lhuna, screbindo ne ls mangeilhos sous poemas. Ende, serei paixarico i teilha!...
Agora flúren telhados cumo flores, cada un de sou quelor, teilhas çfolhadas an cada eimbierno, quando la gilada ancarambina sous cuorpos, por nun séren dessa tierra sous tenhidos, bien más altos ls telhados, adreitos al cielo a medrar.

Abe frie tamien serei , tan frie i tan negra a percura las seinhas de mie nineç:
Ls puntónes dadonde me caí al ribeiro, nien seinha!
La piedra cun sue poçanquita, adonde, a la selobra de la moreira, bebiemos cun la pipa de çanteno l bino de moras cun chinicas ne l fondo… nien chinas, nien piedra! Solo la mie mimória anté un die. ...
Quedará apuis la mie stória, sien que más naide puoda fazer bino na poçanquita…
L´abe frie que an mie moraba, murriu-se de spanto por ber tanta falta de bestígios de história…


Apuis, de tanto tener drento de mi, de tanto tener i todo se me scapar, nada quiero yá tener.
Starei you an cada andorina, an cada reissenhor ou maripiendula, an cada gaibota, albatroç ou funecra, pintaxirgo ou águila.

Cun eilhes bolarei.

2 comentários:

ACangueiro disse...

Salen bózios de lhiberdade, andorinas chilradeiras, paixaricos i paixarinas, bolos al cielo i a la tierra, biages ne l tiempo... bota siempre mais.

beisos,

ac

Adelaide Monteiro disse...

Sálen bózios acontra aqueilhes que nada perserban, nada queda de l que era dantes para que puodamos recustituir las stórias de ninos.
Tanta ansensebelidade atá arrepela!

Beisicos