23/02/09

Sou nobica

Nisto you sou nobica
Acabadica de nacer
Falar nun me custa nadica
L que me mata ye screber

Apuis, na mie tierra diç-se assi
Bós i outros dízen assado
Yá toda me cunfundi
Tengo l caldo arramado

Mas, cumo diç Amadeu,
L que antressa ye ampeçar
I cun algun studo i ajuda
You hei-de alhá chegar

2 comentários:

AF disse...

Buonas nuites Adelaide,

Que gusto tan grande ajuntares-te a esta Quadrilha, i ampeçares assi neste die de Antruido. Sabes, eiqui cada un ye de sue tierra de Miranda, uns a bibir alhá, outros pul mundo. Tu benes de la Speciosa i andas pul mundo, mas na Quadrilha tenes bezinos de Zenízio, de Malhadas, de Caçareilhos, de Cicuiro, de San Pedro, de Fuonte Aldé, de Sendin, de Palaçuolo, de Augas Bibas, de San Martino, i outras tierras que inda han de crecer. I antendemos-mos todos mui bien. La scrita ten que ser armana para todos i bai andando als poucos, bamos-mos ajudando uns als outros.
I tu yá scribes tan bien que esso para ti nun puode ser grande porblema. Nós ye que bamos a daprender cula tue tan guapa forma de screbir.
Bamos palantre i bien benida, mais ua beç. I nun deixaremos de besitar l tou blogue que stá eiqui na lista an Speciosa - cuontas i nobidades.

Amadeu

franciscobelharino disse...

Buonos dies Adelaide,

Seias bien benida a la quadrilha. You nun tengo l prazer de te coincer pessonalmente, mas oubi falar tantas bezes de ti al tou abó Abelino, que anté parece que sós de la familha.
Adelaide, you sou boubielho i l tou abó era l ferreiro de ls mius pais i fui cun el que daprandi a malhar reilhas.
Parabienes pula tue scrita que ye mui guapa i torna siempre.
Un abraço,

Francisco Domingues