Fui a las Froles Mirandesas
Pa las ber risquei ua cerilha
I anton pude you ber
L que dixo la quadrilha
Bi que staba alhá Amadeu
Que ye l xefe na stalha
Por algua cousa serie
Que le dórun aqueilha medalha
Inda nun habie bisto a Ana,
Mas bi-la desta beç
I bien guapa que staba
Cun sue cabra cabrés
Bi tamien a Faustino
Que tamien ye Antão
Las cousas qu'eilhi puso
Cada ua an sue oucasion
I tamien pude you ber
L que dixo Deusdado
Cun todo l qu'eilhi dezie
Passei un cacho angraçado
I tamien staba Artur Esteves
Un cachico amperrado
Mas cada un colga l que ten
I a mais nun ye oubrigado
Se calha la culpa fui mie
Nun fiç la cousa acabada
I ne l decorrer de ls tiempos
You nunca le ansinei nada
Bi que staba alhá Alcina
I bien guapa que staba
De ber aqueilhas cousas
You nunca mais me fartaba
Ancuntrei a Leonardo Antão
Ne l meio daqueilha lista
Tamien gustei de ber
L que dixo l fadista
Tamien a Carlos you bi
I las cousas qu'eilhi tenie
De bé-las nun me cansaba
Nin que stebisse nuite i die
Cristina Martins eilhi staba
Cun sue tese de Doutoramento
Culas las cousas que bi
Digo que quedei mui cuntento
Passei por Alfredo Cameiron
Que staba a meio de la lista
Anté quedei abismado
Cun toda aqueilha bista
Muito más grande ye la lista
Que you eilhi bi
Nun ls pude meter a todos,
Porque eiqui nun cabie
Mas alhá passei por todos
Nun bos quiero anganhar
I para bos tornar a ber
Seguro que buolbo a antrar
Yá agora que alhá antrei
Yá nun quiero you más nada
Nun sou capaç de me drumir
Sin dar eilhi ua oulhada
You quiero meter la pata
Yá me stou a purparar
Qualquier die eilhi starei
Para me poderdes mirar
Quije you dezier las cousas
Que nas froles you bi
I que stou mui cuntento
Tener antrado eilhi
Sou you mui curtico
Quaije nun daprandi a ler
Por esso antrei eiqui
Para cun bocés daprander
Subscrever:
Enviar feedback (Atom)
2 comentários:
Caro amigo Jesé Esteves,
Nien to la Quadrilha bistes:
Hai uns an que nun falestes
I ban a quedar mi tristes.
Anton, a ber se tornais,
De mi nun fágades couso:
Só bengo a las bezes quando
Amadeu me dá sou pouso.
I quanto a Artur, la culpa
de pouco benir ye del:
Faç bien, ten mais que fazer
Repersenta outro papel.
Tamien you nunca me deito
Sien al Froles botar l uolho:
Gusto de l ber a crecer,
Leio todo, nunca scuolho.
Fonso Roixo
Amigo josé Esteves
Muito oubrigado por estes lindos bersicos, que a mie me atinjan de ua forma mui special, porque gustei muito de l berso que me dediquestes.
Gustaba tamien de ser fadista, porque ls fadistas cantan uns de ls melhores i mais lindos bersos i poemas dedicados l amor (de acordo cun studos feito pula UNESCO a nible mundial) por esso eilhes andan a tantar transformar l Fado Portués nun patrimonho de anteresse mundial.
Çtaco nestes buossos lindos bersicos, que cierca de metade de ls nomes que citestes neilhes, son de la Associaçon Cultural i Recreatiba Nial de la Boubielha (Faustino, Deusdado, Alcina, i you) que somos fruitos la dedicaçon que Amadeu Ferreira ten ponido no ansino de la lhéngua mirandesa, an cursos i palhestras dadas eiqui an Lisboa i Corroios.
Çtaco tamien cun muita satisfaçon, ls anteressantes i eiselentes bersos que bós teneis screbido ne l Jornal Nordeste.
Para mie sodes un buono poeta de la lhéngua mirandesa i de la cultura mirandesas. Por esta rezon, homes cumo bós José Esteves nunca seran squecidos.
Puls buossos feitos an prol de l zambuolbimiento de la poesie mirandesa, l mieu muito, muito oubrigado.
Leonardo Antão
Enviar um comentário