L santo casamenteiro

Esta nomeada ye dada a Santo Antonho (de Lisboua ou Pádua). Mas porquei Santo casamenteiro?
Diç la lhienda que habie ua rapaza mui guapa i cun muita priessa de se casar, passando ls dies nun zaspero anfernal d’ancuntrar un rapaç que la lhebasse al altar. Mas nun bie modos de sastisfazer este sou deseio, nun aparecie naide. Fazendo cuntas a la bida resolbiu-se ir a tener c'un artesano que fazie santicos de palo i quijo un que l beneziu i lhebou para sue casa. Ende le arranjou un puial adonde to ls dies fazie las rezas i l pedido dun rapaç, un tiu que fusse, scorreito ou manco nun amportaba para se casar, ponie muitas froles i até le deixaba alguas crouas. Mas naide aparecie que botasse algun anteresse, que fusse an dar l passo alantre.
Passórun-se muitos i muitos anhos. La anfeliç rapaza, cansada de sperar, bie ls dies a passar i l sou deseio de se casar por sastisfazer. Anraibada cula bida i cul Santo un die, zaperada cumo staba, agarrou ne l santico i botou-lo pula jinela afuora. Nesse mesmo momento ambaixo de la sue jinela na rue iba a passar un baliente rapaç, guapo i fermoso, que agarrou ne l santo sien l deixar spartiçar ne l chano. Delantre de tamanha admiraçon fui-se a bater a la puorta adonde moraba la rapaza triste i zacaçuada de la bida, que lo recebiu cun buns modos. Quijo l çtino que lhougo que ls sous oulhares s’ancuntrórun s’einamorórun i se casórun sendo mui felizes para siempre. Stá bien bisto que cula ajuda de l milagro de Santo Antonho.
Tamien diç la lhienda que apuis deste milagro l tiu artesano de santos nunca mais tubo çcanso, puis la percura d’eimaiges de l casamenteiro nunca faltórun.
A Santo Antonho tamien se le dá la nomeada de abogado de las teimas perdidas.

Santo Antonho naciu an Lisboua i fui batizado cul nome de Fernando de Bulhões y Taveira de Azevedo ne l die 15 de l més de Agosto de l anho de 1195. Morriu-se ne l die 13 de l més de Júnio de l anho de 1231, yá fraile. Feitas las cuontas i na buona bida que lhieba un fraile muorriu-se cun 36 anhos. Bien nobico. Fai hoije 777 anhos.