L’Associaçon Cultural i Recreatiba Nial de la Boubielha stá de parabienes.

 

Fui sien dúbedas nanhuas mais ua taluda einiciatiba, esta de la fiesta de Nuossa Senhora de las Candeias pormobida pul’Associaçon.

Assi cuido que todos ls que trabalhórun para queilha fusse possible stan de parabienes i puoden sentir proua porque ls fruito stubo bien a la bista de todos, i quando assi ye ganhan to l mundo.

Na missa de deimingo passado, que  se celebrou a meidie n’Eigreija de la Paróquia de “Val Figueira” dezida pul nuosso cumpanheiro i amigo Pr. António Morais (de Bilachana), que siempre mos recebiu de braços abiertos stubo muita giente, talbeç tenga sido l anho an que mais pessonas s’ajuntórun, ende armanados na fé i relhembrando ls nuossos familiares i cunterrános que yá mos deixórun (yá se muorrírun) rezemos i ganhemos fuorças para cuntinar la nuossa jornada.

 Culas lheituras an mirandés, puis siempre l Pr. António Morais acarinou este modo de las fazer, puis ye el tamien un apaixonado i falante, demos cuntinidade a un de ls oujetibos que se perpuso la direçion, que ye alhargar i tener persente cada beç mais l mirandés ne ls nuossos cumbíbios i atebidades.

 Quando nestas missas las lheituras son lhidas an mirandés, nun las fai defrentes de la outras, nien ye esse l perposito, mas si chamar al de riba la mimória de ls nuossos antepassado, pais i abós que siempre l falórun, poner ne l sou lhugar este patrimonho lhenguístico que mos ye tan querido i se ende la maiorie ten essa lhigaçon anton melhor. 

Apuis de la missa ajuntemos-mos para almuorçar eilhi nua Quinta (restourante) bien acerca adonde quemimos passando ua tarde bien animada i regada, nun faltórun las cumbersas, lhonas i grácias cumo siempre.

 Cumo to l mundo sabe, l tempo de la fogueira de cepos que ardie la nuite anteira a la Capielha, ne l terreiro a meio de l’aldé de Zenízio yá alhá bai, l modernismo i l zambolbimiento puode apagar todo, mas hai alguas cousas que nunca será capaç de pagar que son las nuossa alhembráncias, aqueilho que fui grabado cumo ua de las cousas mais guapas que se fazie, l “DOUS DE FEVREIRO” (fiesta de Nuossa Senhora de las Candeias), la fiesta de la cunfraternizaçon, la fiesta an que nun quedaba naide sien cenar, la fiesta que to las famílias tenien proua an tener cumbidados de fuora a la mesa.

Agora doutro modo, mas acá bamos dando cuntinidade a essas tradiçones i questumes, i fazemos fé i queremos que assi seia, nestes dies todos ls que quejíren s’ajunten i cumbíban.

Cumo astanho era un anho d’eileiçones pa ls uorganos de direcion, realizou-se ua assemblé i la eileiçon de ls nuobos uorganos, a quien fúrun deseados muitos eisitos i un bun trabalho.

Fui guapo ber to l mundo sastisfeito, seinha de que ls ancuontros i cumbíbios son la melhor manzina para ganhar fuorças i bencir las canseiras de l die a die.

Parabienes a todos, l’Associaçon deseia a to l mundo mais ua beç un bun anho de 2013.