LEITURA DE LS LUSÍADAS AN MIRANDÉS – DUARTE MARTINS (Retrato 067)
Duarte Martins (1975) ye de Malhadas, cunceilho de Miranda de l Douro.
Ye formado pula Faculdade de Letras de la Ounibersidade de Lisboua, an
Studos Pertueses. Zde l ampeço de la sue carreira que ye porsor de
Lhéngua i Cultura Mirandesas nas scuolas de l Agrupamiento de Scuolas de
Miranda de l Douro.
Ten feito un amportante trabalho
de recuolha de lhiteratura oural de las Tierras de Miranda, de que
resultórun bárias publicaçones, an special “Bozes de l Praino” [Edições
Nordeste, 2004]. Fundou i derige la rebista “La Gameta”, adonde ten
publicado trabalhos de ls sous alunos, del mesmo i de outras pessoas,
publicaçon que sal hai yá bários anhos i que ye hoije ua refréncia
fundamental de la lhéngua i cultura mirandesas. Nesta rebista podemos
acuntrar testos de bárias centenas de alunos de Lhéngua i Cultura
Mirandesa i muita anformaçon subre bários lhados de la nuossa cultura,
subretodo nas anterbistas que l próprio Duarte eilhi ten publicado. Ten
tamien pormobido la publicaçon de testos de ls sous alunos na “Fuolha
Mirandesa” de l Jornal Nordeste, subretodo por alturas de l Natal.
Tamien ye de lhembrar l trabalho cumo regrante i de repersentaçon de
quelóquios an mirandés, tamien cun ls sous alunos.
Por todo l que
ten feito, l cuntributo de Duarte Martins pa la lhéngua mirandesa ten
sido dua amportança tan grande que, sien el, las cousas nun serien las
mesmas. Assi el nun zanime i nun le fálten las fuorças, l que nun ye
fácele delantre la falta de apoios i la mala cumprenson de quien manda i
mais habie de ajudar. De todo esse trabalho i de ls outros porsosres de
mirandés, yá eiqui falados, depende muito de l feturo de la nuossa
lhéngua.
Apersentou-se a ler acumpanhado de bários alunos, l que
representa bien l sfuorço que ten feito pula nuossa lhéngua al lhargo de
bários anhos, siempre cun poucos apoios i na sprança de que las classes
de Lhéngua i Cultura Mirandesas séian oubrigatórias i dinas seia pa ls
alunos seia pa ls porsores.
Liu las stáncias 39 a 54, 66 a 87, 95 a 97 de l Canto V.
Sem comentários:
Enviar um comentário