Stá acá un barbeiro!...

Stá acá un barbeiro!...

La maiorie de bós yá sabe de l que falo, pul menos ls mais bielhos, nun quier dezir que ls mais nuobos nun téngan oubido l dito muitas bezes, anton se fúren mirandeses i se passórun la sue anfáncia an Zenízio oubírun-lo sembas de bezes.

I se la mie aldé queda nua foia mais ou menos abrigada por uns cabeçicos, l que nun díran ls d’Anfainç, Paradela, Custantin i outros lhugares que quédan zabrigados eili bien a modos de lhebar culas bentanies i ciscas benidas de ls cabeços Cantábricos passado pul praino Zamurano.

I hoije si fazie acá un barbeiro bien capaç de poner ls pelos de la cara de punta, you siempre dixe, çque deixei de bibir ne l praino mirandés que para alhá de muita cousa buona que trouxe pa l mundo, trazie tamien cumigo ua tempra, salida de ls muitos frius agarrados ne ls ambiernos que passei alhá, naqueilhes an que ls nebones, ls nubrineiros, l touron de las giladas, l çanceinho éran la frauga de l miu cuorpo, mas peçque toda essa rejisténcia al friu se stá scapando, yá sinto muito friu porqui adonde moro, las muitas biaiges que fago de la Marge Sur de l riu Teijo até Lisboua boto l capote i uns miotes.

I anton boto-me a pensar –quien tu eras i quien tu yes – ye berdade que nun tembro de friu, nien naide me biu bater l diente, cumo acunteciu alhá, mas fago ua figura que naide diç que sou stramuntano, porque ls stramuntanos siempre fúrun giente an que las adbersidades de l tiempo nunca le metírun miedo. Afazien-se dun jeito que to l mundo antendie dadonde éran, i nun era para menos, qual nun fui l stamuntano que quando apanhaba nabiças neste tiempo nun quedaba culas manos burmeiras de l carambelo que tenien, quien nun se lhembra de l friu que rapabamos quando íbamos de buieiros, quien nun se lembra de l friu que s’agarraba nas classes que nien éramos capazes acochar ls dedos de la mano para agarrar na caneta d’aparo i screbir de tan angarranhidos que stábamos!

Anton s’era aire de riba, daquel que benie de la raia seca, esse cortaba las oureilhas de l mais pintado, qual gorro, qual tapa bocas, l nariç esse era ua zrácia, nun habie nada que l acobrisse, pingaba monca que se fartaba, até la manga de la camisa dar un jeito.

Buono díran muitos, ls mais afoutos, mas l friu i las giladas ténen que benir, i ten que ser neste tiempo, para curar las carnes, l fumeiro, si digo you tamien,que gusto muito dua buona tabafeia, chabiano, chouriço, botielho i l demais, mas se tubisse todo esso i you nun rapasse friu, serie melhor.

Porqui me quedo, benci l friu para screbir esto, i tamien nun boto las culpas ne ls barbeiros.