Inda “las cousas de las nuobas tecnologies” que Bitorino tanto çcunfiaba.

 

A la fin, se calha Bitórino, “50 anhos d'eidade, mirandés scorreito, casado pai de filhos, por bias de las sues mariquices yá nun puode ir ne l buolo 5271 de la TAP, porque l abion yá se fui “ que  çcunfiaba de la bozica que benie de l cumpotador, até tenie rezones de sobra de star de pie atrás i la pulga n'oureilha.

Quien cumo el nun staba, home nacido na década 60 de l seclo datrás, quando se bibie un tiempo de berdade i palabra, fui bendo zfazer-se toda ua relaçon de cunfiança antre las pessonas, zde las falsidades culas cuontas, ls anganhos i mentiras, ls ampustores fúrun medrando i tomando ls lhugares de bien star i çtaque, até las eidentidades falsas passórun a baler mais, giente sien duolo nien feitiu diç l que nun ye para s’ancobrir de buonos i hounestos modos.

De todo esto el fui bendo nestes redadeiros i buonos anhos, bien loinge stá l tiempo an que se puodie acraditar ne l parceiro a nuosso lhado, bien loinge stá l tiempo an que l camarada que conheciemos balie todo. La cousa stá preta i feia i nun ye para menos, bien podemos i debemos boziar que la cunfiança l crédito, debe ser por nós la palabra d’orde i apregonar a to l mundo, que fazendo alrobés queda feio i nun eiduca.

Puis ye, Bitorino assi pensaba porque la catequese i l’eiducaçon que recebiu de ls sous de pequienho quando andaba alhá pa l Cabeço de l Naso i ende oubie ls sermones ne l Santúario, mas la bida pregou-le un cagaço i de ls balientes, quijo Dius que la suorte stubisse de l sou lhado i de l sou nieto, las cousas çcambórun para bien i a tiempo de arrecular caminho, çcobrindo se todo.

Quando eiqui a tempos ua bozica salida dun computador dezie a sou nieto (rapazico de 12 anhos) que era un amigo, que era buona pessona, que querie alhargar las bistas de l mundo i nada habie a temer, era un çafardanas, un bardino de ls balientes, un caronho de to l tamanho, faziesse passar por buona giente i nun era nien mais nien menos qu’un desses que arrebánhan ninos i ninas para çpuis naide saber de l sou rastro ou paradeiro. Que fázen la zgrácias de pessonas einocentes, de famílias anteiras, zde pai i mai, abós até ls parientes menos achegados i amigos.

Lhéban-los para le sacar uorganos, ou séren ousados nas bergonhas. Bitorino nun s’amporta de s’amaneirar, que le chámen çcunfiado ou nó, l que quier ye nun dar nanhua ouportunidade als ouportunistas. Rebiu la sue eiducaçon i postura porque esta sociadade stá chena de rateiras.

Esso si, you quemungo cun Bitórino, i hoije para alhá de todo l que gustaba de que fusse bien çcutido por gobiernos, parlamentos, la  giente de l poder, i hai muitas outras, ye ls peligros que ls nuossos ninos i ninas, jobes de to las eidades, ua eiducaçon i las cautelas que se debe tener, de ls peligros que ende mánan, i nun bonda la família toda star d’atalaia i tener l’arriata curta culs sous filhos cumo ye sue oubrigaçon, ls políticos tamien ténen que antender que eiqui nas nuobas tecnologias, las tecnologies de l’anternete la lhibardade de las Webes, nun puode ser l mote, de l “bal todo”. 

Eilhes (esses sien cara) stan spargidos por to l mundo, sáben-la toda, aporcatai bos i nun deixeis ls einocentes que s’arrímen a eilhes cun falicas mansas.