Casamento antre pessonas de l mesmo sexo

Christiane Taubira, natural de Caiena, Guiana francesa, atual menistra de la Justiça, ancarregada de defender, an França, nestes dies, l projeto de lei subre l casamento antre pessonas de l mesmo sexo.

Fui la cuonta que A. Carrasqueiras eiditou onte (i ua buona gripada tamien que me lhieba a screbir aqui tan cedo porque senó a estas horas yá you nun starie an casa) que me motibou a eiditar you tamien este pequeinho artigo. I retomo para bien dezir, praticamente todo l que cheguei a dezir hai uns segundos a Antonho, se me permite, ne l comentairo que le deixei:  

Por essa Ouropa fuora, inda porriba nestes dies, an países cumo la França i l’Anglatierra, nunca se falou tanto cumo ye agora l caso, se bien me lhembro, ne l projeto de lei subre l casamento antre pessonas de l mesmo sexo, al punto de oubregar ls deputados a debater dies anteiros i até altas horas de la nuite, por eisemplo na Assembléia Nacional francesa; lei essa que an Pertual fui aprobada yá faç agora dous anhos, fazendo de Pertual l uitabo paíç de l mundo a la haber botado.

Toca esse projeto de lei atualmente debatido an França a questones de sociedade que yá dórun ourige a grandes manifestaçones nas grandes cidades francesas nestes últimos tiempos i inda puoden tornar a dar. Nun admira por esso que las decisones seian difíceles de tomar. 

Mas l que antressa apesar de todo ye que puoda haber debate, un berdadeiro debate an que naide seia rediculizado.

Cumprimentos a todos i a todas.

Ana Maria