01/05/11

Lhémbra-se-me…







Si. Lhembra-se-me quando me deziste, para me arrincares las lhágrimas que me salien por antre ls dedos, anquanto çaçamelaba palabras sien sentido. “Porquei stás triste, se nun hai chúbia que nun acabe an sol, anque seia só an racicas de sfregantes”?!
Si, lhembra-se-me que las lhágrimas me abaixórun an canalon cara abaixo i, cumo ribeiro a lhabar la cama, me lhabórun l mandil dun puolo agarrado na bima dura, ne l arrecolher de l feno, na segada que la secura de la boca me adebinaba, al pedir cántara.
Si, lhembra-se-me, á se lhembra!...

Lhembra-se-me que nun mais bulbírun sien quei nien para quei i, agora, quando an ti penso que stás loinge,… (será que stás loinge?),… ye para te dezir mai, cun ua lhagrimica a refrescar-me la cara, que, nun hai anubrada que siempre dure nien hai sol que siempre queime… Cumo me dezies, la criaçon de l mundo fui porfeita: Hai chúbia i a seguir hai sol; hai calma de suberrolho i apuis hai atronadas para que puodamos resfolgar.
Hai cinzas,…mas tamien hai biento…
Stás comigo, anque las lhágrimas nun me cáian!...

Porque hai biento, porque hai biento!!!...




Sem comentários: