17/05/11

Stou anraibado



A mi nun me béngan cun cousas, un home ten dreito a scarafunchar ls sous frunchos.
Porra, tamien ye só l que falta.
Quando me bénen cun falicas mansas, que assi que assado, que hai que tener pacéncia, que cun fé a todo se chega i melhores dies beníran, dantes tamien fui malo, you ampeço lhougo a retrocer l nariç.
Puode, i you sei por spriéncia de bida que muitas son las bezes que ye por bien que fálan , nien to l mundo anda por ende atiçando l lhume, que son palabras de cunsuolo, que l queilhes quieren dezir ye que un nun debe suoltar ls perros. Mas todo ten un lhemite, siempre ls mesmos a lhebar bardascadas ye de mais i yá mie mai dezie que quien nun sinte nun ye filho de buona giente.
Todo ten un lhemite, i ten que haber ua beç, un die que tenemos que dezir bonda, esto de poner las brochas siempre an riba de quien yá nun puode mais, de quien stá derreadico, de quien tanto trabalhou i aforrou la bida toda, ten que acabar. Nun se puoden cuntinar a pedir, nien a scarranchar anriba de quien nunca soube l que éran bacances, a nun ser na santa terrica a pie de ls sous, que aforrou la bida toda, nunca botou fuora nadica, siempre robendo las unhas para nun deber ne l soto.
I agora inda dízen cumo dezie la tie “Crista” (nome de nomeada dua tie) pa l sou macho, tenes que aguantar.
Ne ls die que cuorren un passar-se de las stribeiras, scarafunchar ls frunchos, naide l puode lhebar a mal. Calhar ye pior, quien de sue justícia diç la justícia de todos fai.
A nun ser assi, ls mandones quando mos stan a dar porrada até cúidan que nós gustamos, i de porrada naide gusta, nien ls pregoneiros de ls buns questumes i de la moral.
Que naide se finte, las “Alices” son muitas, l paiç de las marabilhas ye que yá nun hai.

16 comentários:

Ana disse...

Que tristeza! Pertual nun ye anton un paíç marabilhoso ?
Muorre muita giente de fame ende, nun ye berdade?, i ándan tamien muitos çcalços, rotos i sfarrapados... i cun mandones que le dán porradas! Cuitadicos de nós, ls Pertueses!
Mas se assi fusse, até m’admira cumo ye que aqueilhes que dan ua eimage tan negatiba de ls sous derigentes i até de l paíç an giral (L paiç de las marabilhas ye que yá nun hai!) inda nun la fazírun la Reboluçon ?!! De que ye que stan a la spera? pregunto you. Que outros la fágan ?!
Claro que siempre ye mais fácele que seian outros a fazé-la, anton nun ye berdade?!!

Tortulhas disse...

Buonas tardes, Antonho,

Stais carregado de rezon! I nun falhestes ne l palpite: mal spurmantestes a "soltar ls perros" i a refunfunhegar un cachico, lhougo bos saltou l moralista de serbiço a poné-bos l dedo ne l nariç i a abisar para tener tento, que nun se puode dar mala fama de l paiç i ua "eimaige negatiba de ls sous deregentes". Stá-te linda!, se nun fura para chorar, quaije me daba la risa. Cumo dezie l outro: adonde ye que you yá oubi isto?
Mirai giente desta se se acaça cun un lhapeç azul na mano!...
Abraços

Adelaide Monteiro disse...

...i sobretodo sangramos de raiba i rebuolta, se la chibatada ye dada para cobrir falcatruas de alguns como por eisemplo ls que lhebórun l BPN a la faléncia, ls ourdenados de gestores públicos i sue pandilha toda an ampresas públicas, antitutos, ampresas munecipales i toda ua sien fin de smerilar l que ye de todos. Porquei ls que róuban ls denheiros públicos (de bárias maneiras i feitius) nun ban pa la cadena i para alhá disso, nun son oubrigados a pagar l que "zbiórun". Se fússen pobres ye que serie roubórun...
Funciona la justiça? A mi parece-me que nó i como you pensará muita giente, anque quando percurado an público se diga que si, esse si que ye mais "ni".
Acredita-se na mairia de ls políticos d´ua punta a l´outra, an quelores i stampados?
I tenemos que dezir que si cumo se fúramos uns dementes, uns sien raciocínio, só para darmos ua buona eimage a quien tamien mos chupa até al sabugo?
Ye un fabor essa taxa de juro que mos aplicam?
Quieren ajudar Pertual i aplican ua taxa maior que la de la Grécia, quaije eigual a la que pagamos a la China que nun mos conhece de lhado ninguen an ningua ounion, apuis de se ber que la Grécia nun se aguantou nas panturrielhas?
Estas cousas fázen-me até mordisquinas nos oubidos i nun sou capaç de me calhar quando oubo determinadas cousas.
Pagaba-se de buona buntade sabendo que resultou de ua cunjuntura mundial, mas, todo mundo sabe que fui muito mais que isso(falcatruas, despesismo an eisagero, malas políticas eiquenómicas de cotas de preduçon que mos lhebórun a importar quaije todo, i ampuostas por quien tenie mais botos na matérias, ls países ricos, claro stá,etc, etc...)
Que me amporta a mi que me dígan que antes tamien se bibie mal? Puis bibie i disso se me lémbra mui bien... I porque se bibie antes tamien ten que se bibir agora? I só porque antes era ditadura, agora tamien ten que se calhar para agradar a sues sceléncias, de paises mais ricos?
Haba paçéncia, que a mi yá se me sumiu toda!
Buono, yá zabafei... you que ando tan fugida deiqui, al menos serbiu-me de catarze...

Beisicos,

Delaide

Adelaide Monteiro disse...

Digo, catarse.

ACangueiro disse...

Carai l Tiu Antonho Carrasqueiras botou-las de las buonas...assi i todo, foi ameroso...anraibado, alhá dirie Tie Crista: tenes que aguantar!

Abraço, Tiu Carrasqueiras

leonardo antao disse...

Buonas nuites ,

Adelaide caraterizeste mui bien las rezones pulas quales Carrasqueiras stá anraibado.

Todos tenemos muitas rezones para star anraibados:
- Ls númaros assustadores de l zamprego;
- La generalizaçon de la precariadade de l trabalho;
- L definhamiento de setores pordutibos fundamentales pa la dinamizaçon de l mundo rural i pa la nuossa outonomie alimentar; (...)

Cunsidro ye qu'esto ye de tal forma ansustentable, inaceitable i fragelizador de la nuossa democracie, que ten de tener ua repuosta adequada.

Percisamos dun nuobo 25 de Abril? Nó, nun ye esso que stá an causa. De l que percisamos ye de retomar urgentemente l nuosso 25 de Abril, las sues cunquistas, ls sous dreitos, la sue detreminaçon, la sue certeza de querer custruir ua sociadade solidária.

Las cuntestaçones de la “geraçon a la rasca” son proba desso mesmo, de que la Reboluçon stá inacabada, na eiquenomie, nas relaçones sociales, na eiducaçon, na cultura i nas mentalidades. Las zeigualdades i las anjustiças aperfundan-se al ambés de ser cumbatidas. La pobreza de tantos cuntraponen-se a las mal splicadas fertunas.

Pertual bibe sob l garrote dua díbeda sterna anquietante. Aamportante ye cumprender la necidade i ourgença de mudar l rumo para que la situaçon se nun agrabe. Séiamos claros: Ye tiempo de retomar i cumprir Abril.

Culas lhamentables i traumatizantes amboras subre l nuosso querido Pertual, qu'oubimos nestes radadeiros dies, solo un “tsunami democrático” ye capaç de acabar cun esta lhástima i houmilhaçon anternacional la que mos botórun ls radadeiros çgobernantes.

Un beisico para Adelaide i un Abraço para Carrasqueiras, d'amisade i gratidon,
Leonardo.

adeusdado disse...

Si Si Carrasqueiras. Çpuis de ler las buossas razones apetece- me dezir. Carai " quanto mais me bates mais gosto de ti!"

Válter Deusdado

Ana disse...

Hai ciertas formas de çcursos, palabras i maneiras de apersentar ls problemas que ls outros Ouropeus nunca antenderan i cunsideraran até cumo pouco sérios i até doutros tiempos...
i assi, giente, ye que nun se bai mesmo a lhado ningun !!

Adelaide Monteiro disse...

..Si, anfeliçmente hai pessonas a passar fome, i hai un sien fin de fome ambergonhada. You conheço rialidades de scolas que, se nun fura la ansufeciente Açon Social Scolar i l que ls porsores dan para esse eifeitoporque aqueilha yá nun chega, haberie si senhor, muitos alunos a morrer de fome, ou znutridos, porque, l que cómen ye na scola. cada beç mais hai mais giente a bater a la puorta de l Banco Alimentar. Cuido que nun debemos botar postas de pescada quando nun coincemos las rialidades i arraseiramos todo cumo se l raseiro fura la nuossa mesa.
Mandar arrefucir mangas nun bonda porque, hai quien nun las tenga para arrefucir...
cuido que tenemos que las arrefucir, si senhor i que hé-mos de bencir, mas esse arrefucir passa por medidas justas por parte de ls respunsables nua açon cunjunta séias eilhes de quelor fúren. menos partidarices i mais ounion, eisije-se, l pobo debe eisejir, ye ourgente que l eisija.

Fuorça, que palantre se camina!...

delaide

Ana disse...

You nun falarei na 3a pessona!
Se acho que hai que eisijir, nunca starei a la spera que outros l fágan para mi ou ne l miu lhugar!

Ye negatibo eibidentemente usar ciertas lhenguages doutros tiempos an que se fala de "perros", de "porrada", de "machos", de "acaçar" i muitas outras eimages assi(Nun ambento nada, bien sabe quien las usou!). L que ye que stá "lindo" anton? I l que ye que ye negatibo afinal? Solamente l que fázen i dízen ls outros? Siempre ls outros?!
Agora sou you que me rio!

Adelaide Monteiro disse...

You tamien sou l pobo de que falo i cumo eilemento de l pobo tengo siempre lhuitado por ua sociedade mais justa i siempre tengo arrefucido las mangas ( you si las tengo) i, neste arrefucir tamien stá ancluído l trabalho de tipos mui dibersos, ancluindo cun guinchas i gadanhas i cousas afins. Nestas cousas nun me quergas dar liçones, Ana, porque nun quiero andar na classe.
Se bien sabes quando falei ne l Pobo, falei na generalidade, you ancluídos i nó na terceira pessona.
L que tengo que fazer nun l mando fazer a naide i l que tengo que dezir tamien nun l mando dezir por naide i, se dúbidas tebíras, tenes la proba, anque me pareça que stou a çperdiçar tiempo cun quien (que sós tu, Ana), que gusta de anfernizar ls outros, ousando ua forma que mais parece "cumbersa de serrar presunto" para la que nun tengo la mínima pacéncia, dua antoleráncia que bózia mui alto zde que l que ls outros pénsan nun baia al ancontro de l que pensas.
Ri-te si, rir fai bien i a rir la giente acalma.

Buonas nuites.

Delaide

Tortulhas disse...

Buonas nuites,

Ah, Delaide, dórun-me agora mesmo uas ganas balientes de te mandar un beijico i un abraço bien arrochado.
Quien nun le há de achar grácia son "ls outros ouropeus" i quien se arroga l dreito de botar postas de pescada an nome deilhes (yá era perciso tener bien pouco por quien mandar l recado!), que cumo quiera que nun apróban la tue lhenguaige tan atrasada i tan doutros tiempos... mira, tu, serrar persunto?!...
Al menos, que mos baia anton dando la risa.

leonardo antao disse...

Buonas nuites ,
Stás anraibada Adelaide?
A las bezes ye perciso abocanharmos uas palabricas para mos sentirmos bien.
Un beisico,
Leonardo.

Adelaide Monteiro disse...

Anraibada you, Lionardo?
Mas cierto que nó!!! Na eidade an que stou "yá" nun me anraibo cun cousa pouca! Mais ye l que diç l nuosso amigo Sardina ne l último testo, ganas de serbir ua manada de yerba a quien mos quier fazer passar por asnos.Inda citando l testo que bieno mesmo no ponto, "la bida eisige mais cumprenson que coincimiento".
Anraibada, mas nien te passe pula cabeça!!!UI!!!!Se me anraibo sou mui mala i na mie eidade yá solo me anraiba quien you deixo.

Delaide

Ana disse...

Resta a saber, Adelaide, l que ye l'antoleráncia!
Stais cumbencida que teneis toda la rezon i falais na realidade sien saber inda muita cousa. Mas you deixo-bos cula eiluson (porque ye assi que ye neçairo fazer)que sodes cumo Dius: omniciente!
Claro que nun me hei-de rir. Serie andecente!

Adelaide Monteiro disse...

Ende stá l que tu sabes fazer mui bien, Ana, porbocar.
Nun sou nien me sinto onisciente. Sei l lhugarico pequeinho que acupo neste mundo de cuntradiçones i tamien sei que l miu saber ye cumo un granico de arena...
Mas bamos, cuntinando... Nun bou a a arrespinchar a las tues porbocaçones, porque, cunsidero que quien nun fai mais nada que achincalhar cun anterrogaçones i sclamaçones, l que cada un scribe, an beç de poner dua forma hounesta i clara l sou punto de bista,nun merece que faga fé de tales porbocaçones.
Yá que dizes que nun sei muita cousa( cunsidero que sei pouco)l que tu deberies fazer era poner las tues oupeniones cun aquilho que tu sabes i you nó. L froles salirie balorizado i quien lei i quien scribe, nun darie de caras cun cenas deprimientes.
Será que pensas que tenes mais balor i achincalhas, ou alrobés stás cargadica de cumplecços de anferioridade, manifestando-se an criticas nó custrutibas i de antoleráncia an relaçon cun ls demás? Nun ye que me anquemode, mas you se fusse a ti pensaba nesta queston...
Ne l feturo, quando de forma menos séria, manifestes oupeniones a respeito de l que nós screbimos, cunsidera l miu siléncio cun l sentido dua grande andefrençia.
Se, alrobés, antes de publicares l que scribes, lires cun atento, cun sentido de auto-crítica i manifestares las tues eideias cun l respeito que quien te lei merece, serei lheitora atenta.

Até alhá,

Adelaide