19/05/11

Cun mecha




Se habie cousas que m’aborrecien quando era pequeinho, ende culs mius siete uito anhos, era ber ls abiones a passar mui altos cagando fumo, deixando assi a modos duas riscas que s’íban çfazendo.

I quedaba cun tan malo feitiu que muitas éran las bezes que percuraba a mi mesmo, porquei miu pai ls deixaba passar porqui.

Eilhes rachában a meio l cielo de l miu termo cumo quien racha un melon. L miu termo era antendido assi por mi, biraba-me pa riba a caras a la Speciosa, tenie atrás de mi Bilasseco, a la dreita Malhadas i a la squierda Angueira, dende you julgar que benien de Lisboua i íban-se para Spanha.

I matinaba muito, mas porquei pai ls deixa passar porqui, debidindo l nuosso termo an dous cumo se fusse ua quemenéncia!

Hai uns dies datrás stube alhá, i nun ye que me dou cuonta que tal qual cumo quando you era garoto un desses abiones que cágan fumo passou cul mesmo tino que dantes, bruído nun fazie até peçque staba fugindo d’algua cousa que fizo alhá para baixo, melhor you nun l oubie, mas que debie ir bien carregadico i cumpremetido esso debie, pul modo cumo cagaba ls dous rastros de fumo.

Fui anton que me lhembrei que habie ancerrado la sumana que stubírun acá ls tius de la xeta (denheiro), ls fadistas de la CEE i sous cumpadres, a fazer l baliente negócio na capital, i que agora stában de mala abiadas a las sues tierras para festejar, sfregando las manos de cuntentos i un baliente munton de décimas (acordos) ambaixo de l braço assinadas puls nuossos gobernantes.

Nun habie d’ir l abion cun mecha, nun ye to ls dies que se fai un negócio destes, eilhes até andában an pulgas porque tardábamos an bater a la puorta a pedir.

Ah cumo you gustaba que alguas cousas fussen cumo dantes, desta beç nun me quedaba pulas antençones, habie de arranjar modo de dezir a pai que nun ls deixasse passar porqui, que nun ls deixasse rachar l miu termo, porque pula mie tierra nun queremos que passe giente chupona, giente sien cara.

Xeringadelas yá tubimos muitas.






4 comentários:

Ana disse...

Puis ye Faustino. Mas quien ye que aceitarie hoije que deixasse de haber abiones ? Porque cágan fumo i pássan porriba de nós sien mos pedir outorizaçon...

Ye stranho! You siempre gustei de ber abiones. Muitos deilhes até son fabricados i cumcebidos a poucos quilómetros de adonde you moro. Houbo até quien acraditasse que cun essas nuobas alas, l home se podisse aprossimar, un pouco que seia, daqueilho que uns cháman Dius.

Ana disse...

cuncebidos

faustino.antao disse...

-You adoro ber essas marabilhas, salidas de l'anteligéncia houmana, cumo tamien ber nabius ( nun puodie ser doutro modo, puis ls 17 anhos era marineiro de la Real, Cumpetente, Balorosa, Guapa, Honrada, Marina de Guerra Pertuesa).
-Estas marabilhas que amostro ne ls retratos cumo to l mundo biu, son dua sposiçon que you besitei, son an punto pequeinho i nun staba da bien cumigo se nun ls partilhasse cun todos aqueilhes que tamien gústan.
-Só tengo 14 horas de buolo, mas fui ua spriéncia que nunca bou a squecir andar d'abion pula purmeira beç.
-Sabendo l que sei hoije la decison d'ír pa ls barcos ou pa ls abiones íba a ser çfícele de tomar.
-Puis cun estas ambençones ou cun outras que Dius mos ajude a chegar adonde l nuosso coraçon querga.

Beisicos

Faustino

Ana disse...

Son guapíssemos esses abiones, Faustino. Un suonho para ls ninos!

Beisicos tamien