17/05/11

Hai un siléncio que me fala

Spertou-me la lhuna
cun sue lhuç a antrar pula jinela
nesta nuite de lhuna chena
an que l suonho se alborota
neste cuorpo an lhabuta.
Besti-me cun ls sonidos de la nuite
refresquei-me cun l recio
benido dun cielo algo anubrinado
na cercadura de la lhuna.
Matei las soudades i la nostalgia
ancarrapitadas por mies rodrigas
passando-me siempre
para alhá
de ls lhemites de l freijoneiro.
Antreguei-me a la nuite
de cuorpo anteiro
i d´alma a ressumar frescura
nua spertina
que hoije nun me anquemoda
nesta madrugada an que l´ourora
inda drume para outras lunjuras.
L moucho pia
ls grilhos nunca se cánsan
ls paixaros arrólhan ls ninos
acócan-los
an spertina sien fin
l suonho a bolá-l de las prumas.
Lhembra-se-me que será buono
ser paixaro
a anruseirar ls dies nas nuites
nua ourquestra afinada.
Stá guapa esta madrugada
i a esta hora
nien la yerba me parece tamanha
guardada pula gadanha
al sereno
a refrescar las madeiras
para mais un die de jornada.
La canseira
tira l cheiro nas narizes
i,
até yá me bieno a l´eideia,
que srá por isso que nun me cheira
a yerba cortada.
Nesta nuite de sonidos
hai un siléncio que me fala!

2 comentários:

Unknown disse...

PARABÉNS!!!!
Adorei e gostava de partilhar .... para quando a possibilidade de o fazer para o facebook, por exº?
Continuarei atenta.

Abraço

M. José Moreno

Adelaide Monteiro disse...

´´E já, maria!! vou mandá-lo.

Obrigada pela força.

Delaide