02/05/11

L cumbíbio de l’ACRNB (1º de Maio 2011)







Onte die 1 de Maio, cumo yá ben acuntecendo hai muitos anhos, mais ua beç l’Associaçon Cultural i Recreatiba Nial de la Boubielha (ACRNB) lhebou a cabo mais un almuorço/cumbíbio i la realizaçon de jogos populares.


Ne l sprito (senda) de mantener ls cumbíbios i porbomer ls jogos tradecionales antre todos ls associados, sous familiares, cunterráneos i amigos, la Direcion de l’Associaçon (uorgano repunsable pulas atebidades de l’Associaçon) nunca se poupou nien poupa a todo fazer para que estes eibentos cúorren siempre bien i que séian momientos d’ounion, un lhocal adonde todos puodan benir i star an família


Siempre acunteciu até l die d’hoije, ls eibentos pormobidos son cachicos çtinados a renobar tiempos yá bien dantes, chamar l de riba las cuontas d’anfáncia i bibéncias que se negórun al squecimiento i percísan de momientos destes para séren de nuobo cuntadas, son eibentos cul perpósito sano de partilhar, son momientos adonde la nuossa fala ten lhugar cumo lhigaçon stórica a las nuossas raizes, adonde se pon i recibe eideias, se trócan nuobas mais tempranas, porque esso quemido tamien mos fai falta, son momientos que miu specials.



Quando peçque todo s’acabou, ende stan estes ancuontros para fazer la defrença, porque you que nunca me lhembro de haber faltado, an todos eilhes beio seinhas de sastisfaçon i alegrie. Puode qualquiera cuidar que puodie star mais este ou mais aquel, aqueilha família que benie i agora nun ben, mas nun debe ser por ende que mos debemos agarrar ou perder. Bénen queilhes que quieren i puoden (porque tamien hai quien querga star i l momiento nun dá), se ls que bénen quedáren sastisfeitos yá ye buono, debemos balorizar siempre l que se fai, l coletibo debe star siempre arriba de l andebidual, só nun ben quen nun quier ou nun puode i este querer pertençe a cada un de nós, tenemos que respeitar. La direcion de l’Associaçon debe mantener-se cumo l fizo até agora, siempre neste carreiro, todo fazer para l coletibo, nun sprito de pormoçon de l associatibismo.



Partecipar, ajudar i trabalhar culs uorganos, antes, nesse die i apuis tamien debe ser balorizado, i l sprito de ls Zenizíenses yá probou para quien tenie dúbedas que las cousas nun quédan por fazer, son muitas las upas i ls que arrefúcen las mangas.



Este anho cun alguas demudas, la spriéncia yá fui buona, i als poucos i poucos las cousas stan arrimando-se a las ourigens, de cerrona, cadeira i mesa yá todos fúrun chegando al terreiro, i l’eideia de retornar al que acuntecie hai trinta i tal anhos datrás stá ne l bun camino, puis nesse tiempo lhebabamos la manta de trapos para poner ne l chano, l guizado de pito ou canhono, la fogaça, l chouriço, l persunto i l bino.



Todo corriu de feiçon, até l tiempo que ten stado anraibado, stubo ua marabilha, ambora nós séiamos uns perbileijiados, puis gráçias a la Junta de Freguesie de Corroios, sou Persidente i demais colaboradores, mos çponeblizar la antrada pa l terreiro de la Quinta da Marialva, ls assadores i WCs, a quien nós todos debemos star agradecidos por esta logística i demais ajudas, mesmo que l die stubisse malo, tenemos cundiçones de lhebar alantre estes cumbíbios.

Quemiu-se i bubiu-se, jogou-se i ambersou-se, ls prémios (taças i medalhas) fúrun sçtribuidos, zde ls mais bielhos até ls ninos todo l mundo fui amportante, cumo amportante ye fazer la felcidade daqueilhes que gústan de stan cun nós an paç i harmonie.



Parabienes a todos, i muito an special aqueilhes que ajudórun i trabalhórun ne l perparo de las sardinas i febras, aqueilhes que nun se squecírun de la pinga.



Para aqueilhes que nun stubírun a pie de nós, ne l próssimo eibento speramos por bós.


(calcar para ber l bídeo)

Bideo - http://www.youtube.com/watch?v=G76-U5Zlivk

2 comentários:

leonardo antao disse...

Buonas tardes Amigo Faustino,

Ua beç mais la nuossa Associaçon Nial de la Boubielha stá de parabienes porque, apesar de l tiempo nun ajudar muito, tube ua buona partecipaçon, l que mos dá muita proua a todos ls zenizienses.

La fuoça deste nuosso Nial de la Bulbielha stá an mantenermos la fidelidade als questumes i tradiçones de mirandesas de Zenízio i an mantenermos biba la lhéngua mirandesa.

Mui oubrigado a todos ls que trabalhórun pa la sue eisecuçon, a todos ls que nel participórun i a ti Faustino por este eicelente testo i colaboraçon na dibulgaçon deste eibento.

Un arrochado abraço de,
Leonardo

príncipe disse...

Buonas tardes Faustino,

Solo agora stou a antrar ne l froles i bi l tou testo subre l cumbíbio de l Nial de la Boubielha. Astanho por causa de la muorte de miu suogro nun puode star persente, mas cumo yera de sperar corriu todo bien i mais ua beç ls Boubielhos mostrórun que stan ounidos al redor de l sou Nial.

Un abraço,
Francisco