30/04/11

PARA TI QUE SÓS MAI




Para ti que sós mai
Cun tanto amor i carino
Neste die tan special
Un beisico deste tou nino

Para ti que sós mai
I que filha sós tamien
Ye por isso que tu sabes
L gusto que la bida ten

Hoije ye l die de la mai
Estes bersos te quiero dar
Fiç-los cun muito amor
Puis na mie staba a piensar

Eilha era la melhor de l mundo
Cumo eilha nun habie eigual
Oubrigado por m´amares tanto
Miesmo quando te trataba mal

Ne l beilho jardin de las mais
Tu sós la mais beilha flor
I you era l tou pretendido
Puis naci de l tou amor

Para ti mie mai querida
Cun amor i alegrie
L mais grande beiso de l mundo
Quiero-te you dar neste die

Puis se ua mai todo l´anho
Mos dá tanto amor i carino
I mos ambala ne ls sous braços
I mos daba beiicos sin tino

Porquei que só neste die
L mundo mostra antresse
Mas ua mai todo l´anho
Beisos i abraços merece

Beisos i abraços merece
Por eilha ne l mundo mos deixar
Cun buontade i alegrie
Bamos muitos beisos a mandar

Nenhua mai, ye cumo la mie
Isso tengo you ne l piensamento
Mas cun todas las mais de l mundo
Neste die you stou cuntento

Nenhun de nós? Se nun fusse ua mai
Staríe eiqui neste mumento
Cada un cula sue mai
Ten que star siempre cuntento

Mie mai mie maizica
Que un die se spediu de la mauta
I fuisse ambora para siempre
Quando mos fazie tanta falta

Ua mai fai siempre falta
Para mos ambalar, i dar carino
I mos buolber ancarreirar
Se mos perdemos ne l camino

Mas neste die tan special
Cun muito amor i carino
Pa la mie, i todas las outras
Deixo-lhe un beisico cun tino.

UN BEISICO

José António Esteves

3 comentários:

leonardo antao disse...
Este comentário foi removido pelo autor.
leonardo antao disse...

Buonas nuites Amigo Zé Antonho,

Que lhindíssemo poema eiqui mos deixastes a las nuossas mui queridas Mais.

Tamien you yá tentei fazer alguns dedicados a a mie Mai, un deilhes meti-lo, an 8 de Márcio, die anternacional d'a mulhier, cul títalo “ua mulhier-mai”, mas nunca cunsegui nada parecido cun estes buossos tan guapos bersos.

Parabienes por este fantástico poema i puls miles de Beisos i abraços a la buossa i a las nuossas Mais, que bien ls merecen.

Um arrochado abraço.
Leonardo

Almendra disse...

Mui guapo, outelizei-lo cumo ambora d l die 1 ne l HOIJE (www.hoije.pt.vc)

Abraço
Almendra