20/04/11

Bersos zanquietos



Bendi ls mius bersos
Al zbarato
Nua feira, an promoçon.
Leiloei-los
Mas antreguei-los
Na pormeira licitaçon.


Agora dá-me pena
Paridos com tanto delor
Stan yá chenos de balhor
Puolo i pulielha
Para séren bendidos
Cumo anteguidade
I tenéren algun balor.

Mal sabe l feirante
L que eilhes son zanquietos…

Hán-de sacudir la polagueira
I lhibrar-se de l balhor
Outra beç rimas fazeran
I a fugir boziaran
Adius!
Bámos-mos de la feira!



Sem comentários: