07/04/11

Para « einougurar ls crisántemos » !

Inda nun hai ua sumana, na Batalha, l Persidente de la República Pertuesa dixo publicamente qualquiera cousa que a mi me deixou pensatiba:

― Ls pertueses sáben mui bien - dixo el i, cumo ye questume, cun toda la calma de l mundo - que nun cabe al Persidente de la República nien gobernar, nien legislar...

Ancrible! pensei you anque esso nun me tenga surprendido. Bien defrente ye l papel que le atribui la Cunstituiçon Pertuesa se fazirmos ua cumparaçon por eisemplo cul Persidente Francés que ten poderes quaije cumo se fusse un rei…un rei que parece que quier el fazer todo! Inda hai dies, nun tube miedo d’ir até al Japon sabendo que Tóquio solo queda, de Fukushima, a pouco mais de 200 kms… mas ye que la França tamien ten centrales nucleares : mais de 19 (pior inda talbeç que ua bomba atómica !) i alguas deilhas custruídas tamien mui acerca de l mar ; sabendo por outro lhado que muitas nien fúrun einecialmente prebistas para durar tanto tiempo i ténen por bezes yá mais de 40 anhos!! I há-de star muorto tamien, esse nuosso Persidente Francés, por ser un de ls purmeiros a pisar l suolo de la Líbia depuis de la derrota probable de Mouammar Kadhafi (na qual la França s’amplicou diretamente, cumo todos sabeis ) para negociar, cul nuobo poder que fur anstituído, cumo podemos yá eimaginar, cunsequentes cuntratos comerciales de muitos melhones de euros. I nun bundaba que la França stubisse yá militarmente ambuolbida an dous países, sendo l outro l Afeganiston i neste caso zde hai 10 anhos i cun ua lista yá lharga anfeliçmente de suldados muortos (mais de 70); hai trés ou quatro dies, ye na Cuosta de l Marfin que la França decidiu tamien anterbenir al lhado de las outras fuorças de la ONU contra l antigo Persidente Laurent Gbagbo que nun se quier cunsiderar cumo bencido nas últimas eileiçones persidenciales. A tal punto que ne l Strangeiro ye el, Nicolas Sarkosy, que ye afinal mais cunhecido que l purmeiro menistro francés, al cuntrairo de l que se passa por eisemplo an Pertual. Yá agora, a ber se sodes capazes de dezir qual ye l nome de l atual purmeiro menistro francés, an funçon assi i todo zde hai quatro anhos. Çcunfio que nien todos sábades dezir qual ye. Anganho-me ? Mas bá, esso até pouco amporta. Tornemos mas ye pal Persidente Cabaco Silba…


Nun tube tiempo d’ir a saber se ten mais funçones ou pul cuntrairo menos que las que son atribuídas a la Rainha d’Anglaterra mas neste caso eisiste an francés ua spresson para amentar, de maneira algo houmorística (ne l melhor de ls casos !) mas sarcástica tamien por bezes, nas berdadeiras funçones que le son atribuídas a eilha, por eisemplo, cunsiderada assi i todo cumo l xefe de stado de l Reino Ounido i rainha afinal de dezasseis stados andependendientes antre ls quales tamien l Canadá i l' Oustrália para solo citar l nome destes dous. Mas dízen ls Franceses - amentando neilha (sabendo que na stória de las relaçones antre l’Anglaterra i la França tamien chegou a haber ribalidades), mas tamien an ciertas personalidades até francesas que dan l’ampresson de eisercer un poder que nun passa tamien muitas bezes dun poder de representaçon ou de prestígio - que la funçon deilhes ye afinal eissencialmente de « einaugurar ls crisántemos »… ! Quier dezir que pássan ua buona parte de l tiempo a dezir ou a oubir guapos çcursos, l mais de las bezes mui cunsensuales, a besitar lares de la 3a eidade ou anfantários, a atribuir medalhas i cundecoraçones, i a poner froles afinal para einougurar nuobos menumientos, státuas, placas comemoratibas ou eidifícios públicos…

Puis ye, mas hai ua defrença assi i todo antre l xefe de stado pertués i la rainha d’Anglaterra. L Persidente Pertués ye eileito anquanto que eilha nó, yá que l poder de la familha real anglesa les ye transmitido de modo heireditário! Mas ne ls dous casos i se you nun m’anganho, para eilhes dous a quien nun ye dado afinal l poder nien de « gobernar » nien de « legislar », ye denheiro público assi i todo que les ye dado an paga (i bastante até, penso!) para que essa giente puoda anton « einougurar crisántemos » i nó ralas bezes bibir tamien a la grande i a la francesa…

I agora you pregunto. Será que bou mesmo a cuntinar a botar para l Persidente de la República Pertuesa (you que de qualquiera maneira tamien boto an todas las eileiçones que son organizadas an França yá que tamien tengo la nacionalidade francesa), quier dezir para alguien afinal que solo « einougura crisántemos », nun paíç – Pertual - adonde ye questume haber, diga-se de passaige, fuortes percentaiges de abstençon i nua altura inda porriba an que l précio de la gazolina tamien nun pára de oumentar? Ye que para botar nas eileiçones presidenciales ou legislatibas pertuesas sou oubrigada pessonalmente (porque moro ne l strangeiro) a rodar durante uns buns 100 kms zde adonde you moro i tamien sei que ls hai que inda stan mais loinge inda que you, mais de l dobro stou cumbencida ! Será anton que esso me bai finalmente a desmotibar, a mi i a outros tamien a ir a botar?


You, assi i todo : mui deficelemente !


Porque sei aqueilho que spero tamien de la parte dun Persidente de la República, seia el francés ou pertués !

Que mos digan, cumo fui agora l caso de l Persidente Pertués, ou torne inda a dezir que nun le cabe a el, cumo manda antretanto la Cunstituiçon Pertuesa, nien de “gobernar”, nien “legislar”...??!!


Puis you nunca aceitarei que un home político, ou tamien ua mulhier, eileitos puls cidadanos i de que partido ou de que lhado fúren, i inda menos caso eilhes nun seian eileitos cumo tal un rei ou ua rainha, seian pagos (i bien pagos até cumo talbeç ningun de nós será pago un die)... só para “einougurar ls crisántemos“!


« Biba la República ! » i sien heisitaçon... mas sabendo assi i todo que an tiempos de crise cumo estes que stamos a passar (i an França tamien parecendo que nó) nun stamos só a la spera de guapos çcursos… ou que uns pássen l tiempo ounicamente a poner flores para einougurar státuas ou eidefícios... quier dezir, a « einougurar ls crisántemos » !

6 comentários:

leonardo antao disse...

Buonas nuites Ana:

Ls einúmaros eisemplos qu'andicais neste testo justifican bien la buossa pregunta “ Será que bou mesmo a cuntinar a botar pa l Persidente de la República Pertuesa…”.

You tamien tamien fago a mi própio, ua pregunta idéntica, al pensar qu'un Persidente de la República cumo este nuosso atual, cun tanta formaçon na ária d'eiquenomie i finanças, deixou l Gobierno arrastrarmos para este çmoronamiento de l'eiquenomie, pa la dramática i aflitiba situaçon de tenermos de pedir ajuda al FMI i de sermos oubrigados a aceitar aqueilho que ls senhores FMI ne ls quejiren amponer.

Porque sou ua pessona cun muita fé, acradito que Nuossa Senhora de Fátima nun mos abandonará i, ua beç mais, mos salbará deste çcalabro,cun un Lula da Silva, cun fuorça para mudar Pertual.

Felicito-bos Ana, por este testo, nun tema an que stamos todos “a la rasca”.

Un abraço,
Leonardo

Ana Maria disse...

I l próssimo Persidente de la República Pertuesa será...

Luíç Einácio Lula da Silba !

Un abraço para bós, Leonardo.

leonardo antao disse...
Este comentário foi removido pelo autor.
Tortulhas disse...

Buonas nuites, Ana,
Cunfesso que yá li dues ó trés bezes l buosso testo i nun stou an cundiçones de dezir se cuncordo cula buossa oupenion ó nó, nien sequiera antes pul cuntrairo. L que passa ye que nun acabo bien de antender adonde quereis chegar cun todo l que screbistes; ansarilhestes, ansarilhestes i, al fin… crizántemos, nun cheguestes a dezir al que beniedes.

Para quien yá tanto peditório eiqui fizo para la mardomarie de Santa Oubejetebidade, desta beç nun le anfeitestes muito bien l andor.

Ye que se l causo ye aperponer que habiemos de copiar ls franceses, you stou que ye ua eideia algo bafienta, a dar assi a seclo XIX. Ne l seclo XXI nun ye nada “chic” ber ua rapaza a tocar piano i a falar francés; l que agora stá “in” son outros anstrumentos i outras lhénguas. Bien antendo que l ambelhigo de ls franceses seia un cachico grande i puoda tapar l que stá al redror, mas alguien ls habie de abisar que l farol de l mundo yá nun almeia de la cidade lhuç. Ye por isso que you stou cumbancido - mas isto nun passa de la mie oupenion – que, an beç de andar a scheirizar eiqui i eilhi pul mundo, l persidente francés (cun todo l poder que ten de riba del sous çapatos altos) fazie melhor “tener mano” ne l que ten an casa – stricto i lato sensu.

L nuosso, cuitadico, deixai-lo alhá cul poder que ten, inda chega para fazer buonas borradas, a fazer fé ne l que dezien hoije alguns porsores, cumo le péguen metade de las pragas que you le oubi rogar, nun le han de faltar… crizántemos. I nun son para einougurar. Nien para cheirar.

Mas isto tamien son ls porsores pertueses, outros cuitadicos, que nun sáben fazer las cousas i inda nun cunhécen essa eideia genial i cumpletamiente rebelucionaira de ls países cebelizados de l norte: ls cindicatos.

Besitas

leonardo antao disse...

Buonas nuites Ana:

L próssimo Persidente de la República Pertuesa poderá cuntinar a ser un qualquiera "corta fitas", porque la Custituiçon Pertuesa pouco mais l deixa fazer.

Quando referi l nuosso stimado Lula da Silva staba a pensar ne l próssimo Xefe de l Goberno, L Purmeiro Menistro, que pouco se me parece com o Lula, porque, de acordo com as sondagens, será, mui probabelmente l nuosso cunterráneo Pedrito (bilarrealense) apoiado pulas cuostas pul Angelito (abeirense) i apunhalado por dibersos "cumpanheiros" de l mesmo partido, bien partido.

L que you spero nas próssimas eileiçones ye que nesta Pátria,(pula qual you jurei defender até a la muorte), “que nun emerjan cabalhgaduras, que chegan al topo, dezindo tener formaçon, que nunca adquiriran, qu'usen denheiros públicos para se promobíren pessonalmente, face a un público acrítico, ambrutecido i burro”. Clara Ferreira Alves - "Expresso". (Piedo çculpa al animal, por quien tengo mui carinho i admiraçon).

Un abraço,
Leonardo.

Ana disse...

Alfredo Cameirão,
I bós nó, puis nó, nun stais a tentar "ansarilhar" ?!! Nien cun Santos, andores, "mardomaries" i ciertas palabras que usais mas que nun stan an nenhun dicionairo de mirandés ?! Nó, puis nó?!

Adonde bistes bós screbido nesse miu testo que you achaba que ls Pertueses deberien eimitar ls Franceses? Gustais d’ambentar? Puis you, nó!
Mas quedai a saber yá agora que you nun botei nien para un nien para outro desses dous persidentes de que falo nesse miu testo. Mas spero que nun cunsidereis que ye « bafiento » tamien star a refletir i dar ua oupenion subre l que un ou outro faç ou diç...

Yá nun ye « chic » anton, dezis tamien, "ber ua rapaza ne l seclo XXI a tocar piano i a falar francés" ?
Mas, Alfredo Cameirão, anquemódan-bos assi tanto essas rapazas (ne l plural, porque hai mais qu’ua cumo podeis eimaginar)? I yá agora porque só rapaza(s) i nó rapaz(es) ? Nun puoden tocar piano eilhes tamien i falar francés?
Mirai, ye esso tamien que a mi me parece « bafiento » até nun poder mais! Só faltaba essa que mos tornássemos agora todos uns atrasadicos duns sexistas i misóginos de purmeira! Habie de ganhar l Mirandés cun essas burriquices d’outros tiempos!! Cumo nesse seclo XIX an que amentais i que fui un de ls seclos mais misóginos percisamente, anton nun sabiedes ?

I depuis an relaçon al francés, nunca squéçades (Ye un cunseilho!) que inda ye nesse paíç de 60 melhones de habitantes (Parecendo que nó!) que ye la França que bíben 800 000 de ls buossos/nuossos cumpatriotas i por respeito por eilhes, l melhor será pensar mais i melhor an muitas cousas que aqui cheguestes a dezir. I se por acaso tamien achais que l ambelhiego de ls Franceses ye grande demais ou que « l farol de l mundo yá nun almeia de la cidade lhuç » you só spero ua cousa : ye que l farol esse « almeie » anton de terricas cumo San Pedro de la Silba que ten cumo todos sabemos antre outras cousas ua andústria mui amportante de fabricaçon de patatas. Ye anfeliçmente bien caricatural la buossa bison, Alfredo cameirão . Quedai mas ye a saber para la buossa cultura pessonal i para que seia mais abierto l buosso sprito que nun son ralos ls franceses (aqueilhes que nun míran solo para l sou ambelhiego percisamente porque tamien eisíten!) que sáben que nun falta tamien lhuç i ua lhuç bien guapa até nua cidade cumo Lisboa (La capital de Pertual, nun ye?), zde l die por eisemplo an que un cierto Alain Tanner (suíço mas francófono tamien) tubo la buona eideia de realizar un de ls sous mais guapos filmes, an 1983... Deixo-bos ir a saber de l títalo se nun sabeis ou se yá l squecistes!

I para acabar, l que dezis subre « ls porsores (pertueses), outros cuitadicos... » estas palabras son de la buossa outorie! You l outro die só achei stranho nun chegardes a falar de l amportáncia que puoden i dében de tener ls sindicatos para que puoda funcionar corretamiente la democracie... mas torno a dezir : « achei stranho nun chegardes a falar » i era a BÓS pessonalmente que you me derigie i nó a grupos anteiros de pessonas assi sien mais nien menos. Mais ua beç, nun bal la pena star a ambentar ou eimaginar cousas que nun correspónden a la realidade. L cunseilho anton ye lerdes cun mais cuidado ou anton l que ye que quereis : « nien sequiera antes pul cuntrairo » ??!! Tenei juízo mas ye !