25/04/10

Inda sinto...

Inda sinto l friu
De la pobreza çcalça na ruga
Inda sinto l calafriu
Daqueilha biolença cruda.

Inda sinto l´eisolamiento
L´eignorança cumo bandeira
Porque l pobo na eignorança
Sinte la mintira berdadeira.

Inda sinto la fome
De l pan guardado na cerrona
Duro que hoije naide come
Sien que l anrebulhe an bergonha.

Inda sinto las oupreçones
I ls delores de las corriadas
Éran assi las eiducaçones
Subre pessonas calhadas.

Sinto ne l cuorpo un tremor
Nó de friu mas si de spanto
Que se çqueça l ditador
Dun pobo que sufriu tanto!




Biba l vinte cinco de Abril siempre!
Biba la fuorça i l antelgença que l renóben

2 comentários:

ACangueiro disse...

Sente la calor
sente la berdade
sente la baidade
sente la lhiberdade
sente la rebolta d'Abril.

bjs,

ac

Adelaide Monteiro disse...

I sinto que stá na hora de se renobar i que acabe la curruçon i to ls atentados contra la democracie que Abril mos truixo.
Mas tamien nun ye menos berdade que la maiorie de las pessonas nun eimagina l que era l "antes", porque se tebisse bibido esses tiempos nun botaba tanta bufarada...
Hai cousas que an Abril fúrun pormetidas que ne l mundo global an que se bibe nun són aplicábles, outras si i stan a deixá-las ir, mas la culpa nun ye de Abril mas si de las políticas que se l seguírun por TODOS LS GOBERNOS. L pobo que tamien nun ye de todo einocente an cierta medida, precipalmente tener cunfundido la lhiberdade "cun l bal todo" i muitas outras cousas.

Beisicos Antonho i que biba siempre la democracie que ls Capitanes de Abril cunquistórun cun spingardas anfeitaas de crebos burmeilhos.

Adelaide