L ancontro de Bloguers dastanho yá ten data terminada: ye die 21 de Agosto - Sábado -, na Senhora de l Resairo, ne l termo de San Pedro, cerca de las Minas de Santo Adrian.
L Blogue que Abelhón ousou para las anscriçones de l anho passado na Trindade tamien sirbe para agora, podeis ir alhá carregando eiqui.
Ls "Mardomos" stan a tratar de l "cartaç cultural" i de l "porgrama de atebidades" - a ber se ls workshops son subre bitela assada ó subre canhono guisado - mas ua cousa ye cierta: hay que lhebar ua nabalhica para l zambolbimiento de ls trabalhos.
Puode-se ir por Caçareilhos (cortar a la mano squierda nas placas, quien bai de Caçareilhos para la bila) i tamien se puode ir por San Pedro (chegais a San Pedro i procurais pul filho de la porsora i apuis you lhiebo-bos alhá).
Assi i todo, la melhor maneira de quedar a coincer l camino ye ir a la fiesta de la Senhora, que ye ne l purmeiro demingo de Maio, antanho calha die 2; tamien mete merenda, yá sabeis, procurais pul filho de la porsora, anda que bergonha se me ha de fazer nun amanhar un cibo de chicha assada anriba de un carolo i ua pinga de la bota.
Cumo you bos dezira que ye la fiesta más bonita de l Praino, calhando cuidábades que era mintira, cumo you sou de San Pedro, cousa i tal... de maneira que l melhor ye ir a ber, para apuis nun andar a perguntar cumo se passou.
Bah, oupa, botai-bos alhá a fazer las anscriçones, que hai que ampeçar a fazer cuontas a quantos somos.
2 comentários:
Buonas nuites Tortulhas i amigo Alfredo Cameirão.
Este ancontro de Bloguers ye ua buona oucasion para zanferrujarmos la lhéngua, molharmos la palabra I, an special, para mos dar-mos a coincer, yá que muitos de nós solo mos coincemos pula anternete.
Na mie maneira de ber, l maior balor que tenan estes ancontros ye l de la AMISADE i la OUNION que se bai criando i mantenendo antre las pessonas que neilhes partecipan.
Cumo por eiqui, pul Froles, mandamos tantos beijicos i abraços, pus ende teneremos la oucasion para que nun séian solo bertuales.
Alhá spero star, pula purmeira beç, i spero que la quadrilha de l Froles I de l Nial de la Boubielha apareça an fuorça.
Un abraço,
Leonardo
Inda falta muito, mas you si quiero star alhá.
Alfredo tamien me gustarie muito star ne la fiesta, adonde nunca stube mas inda nun ye desta.
Alhá staremos an Agosto! (quando se me lhembra de l´ancontro lhembra-se-me siempre de ls grilhicos...)
Quiero-te dezir que l melhor quemer que me puoden dar ye cordeiro, por isso se fur a botos yá ende stá l miu.
Beisicos,
Delaide
Enviar um comentário