13/04/10

Feliç

Feliç quien cumo tu ten ua tierra
Adonde pise sien sbarrar cun nada
Adonde l´auga mana an fragas
I l galho canta an cada alborada.

Feliç quien cumo tu ten ua fuonte
Adonde torne siempre a buer
De las amisades que an nino custruiu
I mesmo sien stáren, las stéia a ber.

Feliç quien cumo tu ten un telhado
An riba cargadico de lhuzidies streilhas
Scuro l cielo na strelhada nuite
Para que mais relhamposas seian eilhas.

Feliç quien cumo tu ten alguien que mira
L reloijo que cunta la demora
Fazendo de ls minutos horas sien fin
An puiales de piedra, sperando la hora.

Há-de haber un die an que las piedras
Te amostrarán lhágrimas de solidon
Há-des acariná-las i serás tu a cuntar
Acupando l lhugar qu´alhá te quedou.



5 comentários:

Almendra disse...

Feliç l que chega a poder sonhar sentadico nun puial, al fin de dezenas d'anhos, porque muitos nunca chegarán a poder ber ls nietos, por esso digo que debiemos quedar felizes i lhembrar l passado cun felicidade i agradecer, mesmo ls sofrimentos.
Beisicos

Almendra

Adelaide Monteiro disse...

Tenes toda la rezon, Almendra.
La felcidade de star bibo i nun depender de naide ye la maior alegrie que puode haber. Solo ten passado quien ten inda presente i l presente ye la cousa mais barabelhosa que podemos tener.
Que báian benindo ls nietos que puiales yá tenemos...
Beisicos,

Delaide

Abelhón disse...

Buonos dies

- Antón adonde ides este fin de semana?
- A la tierra, i bós?
- Nós quedaremos porqui, na cidade...
I apuis solo cun sous botones: "carai, se calha nun ténen tiera"

Adelaide Monteiro disse...

You tengo amigas que me dezien que tenien pena de nun tener tierra porque son deiqui.
Eiqui todo mundo ye de San Sabastian de la Pedreira que ye onde queda la maternidade de Lisboua i adonde nacien la quaije totalidsde de ls ninos.
Que fertuna tenermos un puial a spera...

franciscobelharino disse...

Buonos dies Delaide,

Ye berdade, tener un cachico de tierra que mos dá l sentido de pertença ye mui amportante. Nós tenemos essa suorte i alhá bamos amenudades bezes a buer de la fuonte para cuntinar a lhembra l passado que bai alimentando l persente para que haba feturo. Nien todos ténen esse perbileijo.
Un abraço,

Francisco Domingues