Este podie ser l títalo dua reportaige
Botei-me por ende a scuitar l que las pessonas cuídan de l 25 d’Abril, de l de 1974, i tamien de l d’agora
I fui strourdinário, oubi cousas bien bariadas, zde ls que yá míran para esse die cun cierta rábia i muito deçden, passando por aqueilhes que nada le diç, ancólhen ls ombros, nun géstio de tanto se medou, cumo até quien esse die i l que acunteciu nada sabe, nesta terceira parte anda muita giente nuoba.
Mirar pa l que acunteciu na nuite de 24 para 25 d’Abril de 1974, que fui ua rebuolta de ls melitares que l pobo agarrou yá an fugida i la batizou de Reboluçon de ls Crabos, cun deçden, a miu ber nun queda bien, mesmo que haba danhos pessonales, mesmo que muitas pormessas téngan ido pul’auga abaixo, mesmo que l sprito de lhibertaçon an muitos causos fusse atraiçonado, mesmo que haba cousas que nun stan bien i até cuidamos que dantes stában melhor, que cun eilha téngan benido balores pochos, que l nible de respeito pulas tradiçones i questumes tenga abaixado, que la certeza dun feturo melhor seia ua miraije, que l’eiquenomie ande pulas rues de l’amargura.
Cun todo l respeito que siempre tube cun todas las oupeniones, quiero dezir que quando assi se pensa, pensasse solo cula barriga, nesse nuite bieno muito mais, bieno lhibardade, benírun ls aliçaces para custruir ua sociadade mais eigualitaria i mais fraterna, se esses balores nun stan cunsolidados, çtribiudos i anraizados la culpa nun fui de la Reboluçon. Para alhá de l ato afouto i heiroico de ls melitares an agarrar ls mandones pul cuornos, ato que nunca debemos squecer, puis l pobo tenie la gana, cuncéncia i fuorça, mas nun tenie las armas que era ua de las cousas que fazie la çfrença.
Pensar que l 25 de d’abril nun ten amportáncia, ye correr un risco mui fuorte, ye deixar muorrir-se la chama, deixar arrefecer algue que demodou para siempre la stória de l nuosso paiç, que l puso al nible de ls demais paizes democráticos, adonde l pobo ten l dreito de decidir cul sou boto qual debe ser l sou çtino. Mirar para esse die i l quel simboliza, cun ancolher d’ombros ye andar a leste nesta bida, ye nun danteder patabina de nada, siempre ls pobos percisórun de marcos de referéncia para custruir l sou feturo, siempre ls pobos ousórun simblos para consolidar la sue eidentidade.
Quanto als mais nuobos, aqueilhes que até nacírun apuis, sien ls çculpar, cuido que la culpa l mais de las bezes nun ye deilhes, la sociadade fetura será l que nós quejirmos. Se n’eiducaçon i ne l ansino nun botarmos cumbicçon i ampeinho, eilhes solo por si nun bénen, se nesses trabiados furmos ancenaçones pachouchadas, la comédia sal falhada.
Podemos até pensar que esta paçmaceira até cúmben a alguns, esta democracia adonde cada un diç i fai l que quier que naide bai preso, que esta lhibardade se presta a todo, mas nada de mos deixar arrolhar i muito menos adrumecer, porque ls jobes merecer i quieren la berdade, tenemos l que merecemos, teneremos melhor se para esso fazirmos i trabalharmos.
8 comentários:
Até me arrepelo quando oubo a falar mal de l 25 de Abril i que antes era melhor, que se perdírun balores...i bujardices assi ou piores. Mas será que las pessonas ténen cuncéncia de l que dízen!?? De las dues ua: Ou éran perbilegiados antes i nunca sofrírun ne la ditadura, ou nun saben l que dízen. You gustaba de ber muita giente que apergona isso a bibir ne l tiempo de la ditadura nien que solo fusse un més...
I porqui me quedo festejando siempre ne l miu peito, Abril. Abril.
Nun stá todo buono, ye berdade, mas starie melhor se nun houbísse habido l 25 de Abril???
Teneis rezon quando dezies que todos esses sentires son peligrosos i solo demostran eignoráncia i egocentrismo.
Un abraço i,
Abril siempre, facismo nunca mais!...
Solo quien nun coinciu la bida de la maiorie de las pessonas antes de l 25 de Abril de 1974, ye que puode dezir que datrás era melhor. Quantos de ls idosos que nun tenien filhos amigos pa ls tratar nun morrírun cun fome i na miséria. Nesses tiempos nun habie lhares para adonde ir i la penson de reforma que ampeçou solo ne l tiempo de Marcelo Caetano, nien todos tenien dreito a eilha i yera tan pequeinha que nun daba para nada. Hoije ye berdade que las cousas nun stan buonas, mas acumparado cun esses tiempos isto ye ua Primabera. Ls bielhos cun la sue reforma que nun ye grande puoden tener ls sous mimicos que na sue bida dura de trabalho nunca tubírun. Se nun hai filhos para star cun eilhes hai ls lhares adonde nien siempre son bien tratados ye berdade, mas ne l giral tenemos que acraditar que hai sítios adonde eilhes stan bien i son bien tratados. Quanto als jobes ye pena que muitos deilhes nun tengan cuncéncia de l que era la bida nesse tiempo, mas la nuossa Stória inda ye mui probe nesse parte i na maiorie de las bezes nien essa se dá.
Buonas nuites Faustino,
Este antressante testo atinge-me ne l mais fondo de l miu coraçon, porque la nuite de 23 para 24 de Abril de 1974 fui ua de las mais dramáticas que passei na mie bida.
Fardado cun uniforme de cumbate, çperto, sien adromecer un segundo, a scuitar, mui baixico, l radio, i pronto para partecipar na rebuluçon.
La única certeza que you tube toda essa lhonga nuite, fui l'ancerteza total de l que me poderie acuntecer ne l die seguinte.
Se esta”reboluçon de ls crabos” nun tubisse sido ganha pulas fuorças de ls jobens Oufeciales de l Mobimiento las Fuorças Armadas, mais coincidas por Mobimiento de ls Capitanes, you tenerie probablemente sido cunsidrado un de ls traidores a la Pátria i, mui probablemente, preso i fuzilado.
Fui un Prebilégio Stórico para muitos de ls mieus camaradas de curso de la Academia Militar, teneram-se abinturado i arriscado la bida i la carreira militar para daran l grande salto Stórico para Pertual se poder “Descolonizar, Democretizar e Desenvoler” (3Ds).
Estes corajosos mius camaradas nunca deban quedar squecidos.Pul sou feito de balentie mereçan ls nuossos maiores i melhores agradecimientos i un arrochado abraço.
Buonas nuites.
Apesar de concordar de uma forma geral com este texto, não concordo nada com essa generalização de que as pessoas que nasceram depois do 25 de Abril não sabem o que é, nem como era a vida antes, nem não sei quê e «renhonhon». A célebre frase «isto precisa é de um Salazar em cada esquina» é normalmente dita por pessoas acima dos 60 anos e não me passaria pela cabeça dizer que todas as pessoas acima dessa idade defendem o salazarismo. Há que ter cuidado com as generalizações.
Sobre o tema, muito mais haveria a dizer. Se calhar, um dia destes ainda escrevo um post sobre isso.
Abraço a todos.
Buonas nuites Fir,
Gustei desta tua radadeira frase "subre l tema, mui mais haberie a dezir. Se calhar, un die destes inda screbo un post subre esso".
L que you gustaba muito era que scrbisses subre este assunto, porque ye un tema antressante.
Solo te lhembro que un moço cun 25 anhos de trabalho duro, nun arriscaba la bida por nada, por pouca cousa.
Habie amportantes balores a defender, un deilhes era este la LIBERDADE DE EXPRESSON.
Alguns de nós, jobens Oficiais, que gustabamos de falar a la buntade, nun aguentabamos mais esta asfixia que se bebie ne ls mius anhos de studante.
Un arrochado abraço de,
Leonardo
Buonas nuites Leonardo,
quando li o seu comentário, recordei-me que, afinal, já tinha publicado um texto sobre o 25 de Abril aqui no Froles (em 2008). Fui relê-lo e, para além de achar que algumas frases podiam estar mais bem escritas, a minha opinião não mudou muito. Em termos factuais, está apenas desactualizado quando diz que temos um governo de maioria absoluta. Se tiver vontade de o ler, pode seguir este link: http://frolesmirandesas.blogspot.com/2008/04/abril.html
Acrescento apenas algumas coisas:
- Continuo a festejar o 25 de Abril, mas com um certo nó na garganta. Custa gritar «o povo unido jamais será vencido» quando se vê tanto individualismo e tanto egoísmo à nossa volta.
- Com o 25 de Abril, as pessoas acreditaram que se tinha conquistado definitivamente a Liberdade. Grande erro. A Liberdade tem de se conquistar todos os dias.
- Há muita gente que ainda não percebeu o que quer dizer Democracia nem Liberdade (nem a responsabilidade que ela implica).
- Há muitas mudanças a fazer, especialmente ao nível das mentalidades.
- Há essencialmente duas coisas que me angustiam no 25 de Abril. A primeira são as expectativas que ele trouxe e que não se cumpriram. A segunda são as coisas que se cumpriram e se perderam ou se estão a perder.
Para concluir: viva o 25 de Abril. Faz falta uma nova Revolução. Com urgência.
Buonas Nuites Amigo FIR,
Parabienes pul testo subre l 25 de Abril.
Fico cuntente an reconheceres que "faç falta ua nuoba reboluçon" i que "la lhibardade ten de ser cunquistada todos ls dies".
Ne l 25 de Abril de 1974 nun teniemos las lhibardades que tenemos hoije, mas quando oubo tanta mala ambora subre corrupçon, pedofelia, zamprego, falhéncias, crimes eiquenómicos,.. .tamien me anterrogo:
- Nun haberá lhibardade la mais?
- La berdadeira lhibardade i las buonas cundiçones de bida solo ls ricos las puoden tener?
You i tu amigo Fir, deseamos la mesma cousa, ua sociadade mais justa, cun ua classe política mais próssimo de las populaçones na lhuita contra todas las anjustiças i las zeigualddades i por melhores cundiçones de bida social, cultural i eiquenómica.
Oubrigado Fir por me amostrares qu'outro 25 de Abril faç falta, para esso bamos cuntinar a lhuitar pula berdadeira lhibardade, por melhores cundiçones de bida, pula democratizaçon de todos ls setores de la bida de l nuosso paíç i assi staremos a dar cuntenidade al sprito de ls "jobens capitanes d’Abril".
Seremos uns berdadeiros "capitanes d’Abril" se nun dermos boç a l'andiferença, al "nun bal la pena", se nunca mos cansarmos de lhuitar, todos ls dies, pula lhiberdade i por un mundo cun menos zeigualdades i cun menos anjustiças.
Un abraço,
Leonardo
Enviar um comentário