26/12/07

Mais ua pita que atrabessou la strada

Aqui hai cousa de dues sumanas, Tortulhas screbiu sobre ua bielha lhona, La Pita porquei atrabessou la strada?, i fizo un adbertimiento angraçada anquanto eimaginaba la respuosta de alguas pessonas afamadas. You achei grácia i dou-me la gana antrar ne l adbertimiento. Nun pude fazé-lo naqueilha altura, mas mais bale tarde que nunca. La pita, porquei atrabessou la strada?

Jesé Socras - Fui un momiento stórico, quando la pita atrabessou la strada, ye la proba de que l goberno stá ne l camino cierto i que ls sfuorços de ls pertueses stan a dar resultado.

Jesé Socras (mais tarde) - Ye perciso garantir que la pita nun atrabessou la strada sin pagar portaige.

Cavaco Silva (hai muito tiempo) - Deixai-la atrabessar. You só quiero que la déixen atrabessar.

Cavaco Silva (hai pouco tiempo) - Que ye perciso fazer para que mais pitas atrabéssen la strada?

António Guterres - La strada ten cinco metros de lhargura. Cada passo que la pita dá mide dous centímetros punto quatro. Quantos passos son percisos? Ora, trés bezes seis, dezuito, a debidir por siete dá... ye fazer la cuonta.

Santana Lopes - La pita atrabessa la strada i bós anterrumpeis la anterbista? L paiç stá boubo.

Mário Lino - Adonde ye que la pita atrabessou la strada? Nun foi na Marge Sul, porque alhá nun hai stradas, nun hai pitas, nun hai nada.

Mário Lino (mais tarde) - Se las pitas adebínan terramotos, esta atrabessou la strada para se refugiar na staçon de l Terreiro do Paço.

Freitas do Amaral - Debiemos ourganizar un campeonato de futebol antre pitas, raposas i perros, para pormober la paç antre ls animales.

Valter Lemos - Se la pita atrabessou la strada para faltar a la scuola, nun hai problema. Eilha depuis faç un eisame.

Isabel Pires de Lima - La pita atrabessou la strada, la strada foi atrabessado pula pita, fui un momento de ua enorme amportança cultural i foi un momento cultural mui amportante, i, i...

Jerónimo de Sousa - La camarada pita cumprometiu-se a deixar la strada quando l partido assí antendisse.

Luísa Mesquita - L Jerónimo de Sousa garantiu que la pita podie atrabessar la strada quando quejisse.

Luís de Camões - Las armas i pitas assinaladas / que de l'oucidental praia lusitana / por stradas nunca dantes atrabessadas / passóran inda alhá la Taprobana.

Jorge Palma - Anquanto houbir strada para andar / la pita bai atrabessar / anquanto houbir strada para andar.

Fernando Pessoa - Ai que prazer / nun cumprir un deber / Tener ua strada para percorrer / i nun l fazer.

Shakespeare (Hamlet) - Atrabessar ó nun atrabessar, ye la question.

Shakespeare (Hamlet, otra beç) - Hai mais pitas a atrabessar la strada, Hourácio, do que sonha la buossa bana filosofie.

Jasus Cristo - Quien nunca atrabessou ua strada, que atire la purmeira piedra.

Pedro (decíplo de Jasus) - Nun conheço la pita que atrabessou la strada. Nun conheço la pita que atrabessou la strada. Nun conheço la pita que atrabessou la strada.

José Carlos Malato - Yá fui mui feliç a atrabessar stradas.

Pinto Monteiro - Nun me admiraba que essa pita stubisse an scuita.

João César das Neves - La pita ye superior al galo, tal cumo la mulhier ye superior al home. Por séren seres superiores, la mulhier debe de quedar na cozina i la pita debe de quedar ne l polheiro.

Jerry Seinfeld - La pergunta ye: la pita inda ye mestre de l sou domínio?

Lili Caneças - Atrabessar la strada ye l cuntrairo de nun atrabessar la strada.

Cristiano Ronaldo - Se la pita nun se mexisse, se nun salisse de l polheiro i nun atrabessasse la strada, eilha nun rendie.

David Lynch - Se la pita se dedicasse a la meditaçon trancendental, tenerie mais auto-stima i nun tenerie necidade de atrabessar la strada.

Tortulhas - You yá stou cumo l otro: ua pita que sabe atrabessar, atrabessa; se nun sabe atrabessar, ansina; se nun sabe ansinar, ye ua antelectual.

6 comentários:

Ana disse...

I yá agora diga-mos tamien Fir l que pensa de l pensar que atribui a esse cumpanheiro de scrita que ye tamien Tortulhas. Deia-mos tamien la sue opinion. Todo esto m’antressa porque tamien ansino ; talbeç yá l sabisse… Quanto a cunsiderar-me antelectual, olhe la cousa ye mui simpres. Ou somos todos antelelectuales ou anton l nuosso cérebro ye tan pequeinho, pequerrixo, cumo l de las pitas ; eigual, esso yá l sabie, al de ls pitos i de ls galhos tamien…a atrabessar ou nó la rue.
Cumo puode ber, lhieba-mos mesmo mui loinge esta nuossa cumbersa tan, tan, tan antelectual subre pitas i pitos que a estas horas yá dúrmen çcansadamente i deixórun de atrabessar l quier que fusse yá quantá !
Burros son mas ye aqueilhes que pérden tiempo sien antender estas cousas. Mas l que ye que se le poderá fazer ?
Nada !

Unknown disse...

Sabes, Fir, hai que ber bien se esso todo de que falas i de que yá falou Tortulhas ye possible. Senó arrepara:
- quando you me criei, las pitas andában pula rue i podien atrabessar todo i até stradas, mas la berdade ye que nesse tiempo nien stradas habie pa ls mius lhados; assi sendo, nun se atrabessa l que nun hai;
- apuis bieno ua lei que dixo que las pitas nun podien andar na rue, i portanto nun podien atrabessar fusse l que fusse; anton yá habie stradas, mas las pitas stában ancerradas ne l polheiro;
- apuis nun hai que squecer ls de la ASAE, que quando béien pitas pula rue até se cégan, nua baia a benir ende la gripe de las pitas;

You cuntinaba, mas yá dá para ber la ampossiblidade de la situaçon. I se la pita atrabessou mesmo la strada?... debo de ser you que stou anganhado. Assi i todo algo me sona a stranho al ber que de tanta giente solo sal alta filosofie i nun aparece un solo diabro que le deia la gana de comer la pita... será que nun hai desses?

Tortulhas disse...

Biba, Fir, buonas nuites!

Las buossas respuostas son...geniales! mas peç-me que inda bos squecistes de ua:

FIR - La pita yá habie mercado l belhete para ir a ber un quelóquio que strenaba nun tablado de l outro lhado de la strada. :)

Un abraço

Artur Esteves disse...

la pita atrabessou atrabessou la strada! Esso ye certo. La mie casa ye de l outro lado de la strada e you acabei de la comer.

AF disse...

I que tal staba, á Artur?
I cumo la faziste, fui churrasco ou cabidela?

Artur Esteves disse...

Staba buona si, fui de churrasco, ya num tenie sangre. La strada tenie muitos carros.